જામનગર
દેવભૂમિ દ્વારકા જિલ્લાના ભાણવડ તાલુકાના ચોખંડા ગામે રહેતો કાના અરજણભાઈ ભાટુ નામનો શખ્સે રદ્દ કરાયેલી ભારતીય ચલણની ૫૦૦ના દરની નોટ પોતાના ઘરમાં સંગ્રહી હોવાની જિલ્લાના એસઓજી પોલીસ બાતમી મળી હતી. આ હકીકતના આધારે એસ.ઓ.જી પીઆઈ સિંગરખીયા સહિતના સ્ટાફે દરોડો પાડ્યો હતો. આ દરોડા દરમિયાન કાનાના કબજામાંથી રૂપિયા ૩ લાખ ૫૫ હજાર કિંમતની ૭૧૦ નંગ ૫૦૦ના દરની જૂની ચલણી નોટ મળી આવી હતી. આ શખ્સની પૂછપરછ દરમિયાન તેનો મિત્ર પોરબંદર જિલ્લાના ભાવપર ગામે રહેતો વાઘા રાજાભાઈ ઓડેદરા પણ પોતાના ઘરે રૂપિયા ૫૦૦ના દરની જૂની ચલણી નોટો રાખી હોવાની વિગતો સામે આવી હતી. કાના ભાટુના ઘરમાંથી નોટો ઝડપી પોલીસે તેના મિત્રને ત્યાં દરોડો પાડ્યો હતો. જેના ઘરની તલાશી લેતાં રૂપિયા ૨ લાખ ૪ હજારની કિંમત ૪૮૦ નંગ રૂપિયા ૫૦૦ના દરની જૂની ચલણી નોટો મળી આવી હતી. પોલીસે રૂપિયા ૫ લાખ ૯૫ હજારની કિંમતની આ નોટો કબ્જે કરી બંને શખ્સો સામે કાયદેસરની કાર્યવાહી હાથ ધરી છે.દેવભૂમી દ્વારકા જિલ્લાના ભાણવડમાંથી અને પોરબંદરમાંથી જૂની ચલણી નોટોનો જથ્થો ઝડપાયો છે. પોલીસે બાતમીના આધારે રેડ કરીને ભાણવડ તાલુકાના ચોખંડા ગામથી અને પોરબંદર જિલ્લાના ભાવપર ગામેથી બે શખ્સોને રૂપિયા ૫ લાખ ૯૫ હજારની ૮૯૦ નંગ ૫૦૦ના દરની જૂની ચલણી નોટો સાથે ઝડપી પાડ્યા છે.
