નવીદિલ્હી
કેન્દ્રીય તપાસ એજન્સી ઈડીએ ક્રિપ્ટોકરન્સી એક્સચેન્જ પ્લેટફોર્મ વઝીરએક્સના એક ડાયરેક્ટર વિરુદ્ધ આકરી કાર્યવાહી કરી છે. આ કાર્યવાહી હેઠળ વઝીરએક્સની માલિકી હક ધરાવતી અને તેને ઓપરેટ કરતી કંપની ઝૈમાઇ લેબ્સ પ્રાઈવેટ લી.ના એક ડાયરેક્ટરનું બેંક અકાઉન્ટ ફ્રીઝ કરી દીધું છે. આ બેંક અકાઉન્ટમાં ૬૪.૫ કરોડ રૂપિયા જમા છે. આ ઉપરાંત ઈડી દ્વારા ડાયરેક્ટરની ઓફિસ-ઘર અને વિવિધ સ્થળો પર દરોડા પાડવામાં આવ્યા છે. કેન્દ્રીય તપાસ એજન્સી ઈડીના આરોપ છે કે વઝીરએક્સની મદદથી ચાલતી ૧૬ ફિનટેક કંપનીઓએ વર્ચુઅલ ક્રિપ્ટો એસેટ્સની ખરીદી અને ટ્રાન્સફરમાં છેતરપિંડી કરી છે, આ સાથે રિઝર્વ બેંકના નિયમોનો ભંગ કર્યો છે. ઈડીના અધિકારીઓના કહેવા મુજબ પ્રિવેન્શન ઓફ મની લોન્ડરિંગ એક્ટ હેઠળ ૩ ઓગષ્ટે એક સર્ચ ઓપરેશન હાથ ધર્યું, એમાં જાણવા મળ્યું કે વઝીરએક્સના એક ડાયરેક્ટર સમીર મ્હાત્રેમને વઝીરએક્સના ડેટાબેઝનો સંપૂર્ણ રિમોટ એક્સેસ હતો. પરંતુ તેમ છતાં ક્રિપ્ટો એસેટ્સથી સંબંધિત ડિટેલ્સ આપી રહ્યા નહતા. ગત મહિને ઈડીએ કેટલાક ક્રિપ્ટો એક્સચેન્જાેને સમન્સ મોકલ્યા હતા. આ સમન્સ કથિત રીતે મની લોન્ડરિંગ અને ફોરેન એક્સચેન્જના નિયમોનો ભંગ કરવા બદલ પાઠવવામાં આવ્યા હતા, જેમાં કોઈનડીસીએક્સ, વઝીરએક્સ અને કોઇનસ્વિચ કુબેર સામેલ હતા. આ મામલે હવે રાજ્યસભામાં નાણામંત્રી(રાજ્યકક્ષા) પંકજ ચૌધરીએ કહ્યું છે કે ઇડી, ક્રિપ્ટો એક્સચેન્જ વઝીરએક્સ દ્વારા ૨૭૯૦ કરોડ રૂપિયાની હેરાફેરીની કથિત રીતે તપાસ કરી રહી છે. આ ઉપરાંત વઝીરએક્સ વિરુદ્ધ એક અન્ય મામલાની પણ તપાસ ચાલી રહી છે.
