મુંબઈ
શમશેરાને પરિયડ એક્શન ડ્રામા તરીકે ઓળખવામાં આવે છે. આ ફિલ્મમાં પહેલીવાર રણબીરે ડબલ રોલ કર્યો છે. સંજય દત્તે ફિલ્મમાં ક્રૂર પોલીસ ઓફિસર શુદ્ધ સિંહનો રોલ કર્યો છે, જ્યારે રણબીર કપૂર પોતાના કબીલાને બચાવવા માટે ઝઝૂમી રહ્યો છે. શમશેરાનો બિહાઈન્ડ ધ સીન્સ વીડિયો રિલિઝ થયો છે. આ વીડિયોમાં સંજય દત્ત કહી રહ્યા છે કે, એક્શન સીન્સનું શૂટિંગ ખૂબ અઘરું હતું. રણબીર અને સંજય માટે શૂટિંગ પૂરતું ફાઈટ કરવાનું પણ અઘરું હતું. કારણ કે, રીયલ લાઈફમાં તેઓ એકબીજાની ખૂબ નજીક છે. ડાયરેક્ટર કરણ મલહોત્રાએ પણ સ્વીકાર્યુ હતું કે, રણબીર અને સંજય ફાઈટ સીન્સ દરમયાન ખૂબ ચિંતિત રહેતા હતા. રણબીર સાથે એક્શન સીન હોય ત્યારે સંજય દત્ત ખૂબ એલર્ટ થઈ જતા હતા. કારણ કે, તેઓ રણબીરને દીકરા જેવો માને છે. સંજય દત્ત ડાયરેક્ટરને કહેતા હતા કે, બેટા આવું કરવા જતાં રણબીરને વાગી ના જાય. બીજી બાજુ રણબીર પણ સંજય દત્ત પર હાથ ઉપાડી શકતો ન હતો. એક્શન સીનમાં તે કહેતો કે, આ સંજય દત્ત છે યાર. આવું કઈ રીતે કરી શકું. સંજય દત્તે જણાવ્યું હતું કે, રણબીર બાળક હતો ત્યારથી રીલેશન છે. તેની વાત આવે ત્યારે ચિંતા સ્વાભાવિક છે. રણબીરે કહ્યું કે, ૯-૧૦ વર્ષની ઉંમરે મારા કબાટમાં સંજય દત્તના ફોટોગ્રાફ્સ લાગેલા હતા. બાદમાં તેમની બાયોપિક કરવા મળી અને હવે ક્રૂર શુદ્ધ સિંહ સાથે કામ કરવાનું છે. સંજય દત્ત અને રણબીર કપૂર વચ્ચેનું સ્પેશિયલ બોન્ડિંગ જગજાહેર છે. સંજય દત્ત હંમેશા રણબીરને નાના બાળકની જેમ ટ્રીટ કરે છે. સંજય દત્તની બાયોપિકમાં રણબીરે સંજયનો રોલ કર્યો હતો. હવે શમશેરામાં સંજય દત્ત અને રણબીરે એકબીજાના કટ્ટર દુશ્મનનો રોલ કરવાનો છે. દુશ્મનો વચ્ચે ફાઈટ થવાનું સ્વાભાવિક છે, પરંતુ ફાઈટ સીનના શૂટિંગ દરમિયાન રણબીર પર હાથ ઉપાડતાં સંજુ બાબાનો જીવ ચાલતો ન હતો.
