ઇસ્લામાબાદ
પાકિસ્તાનના ભૂતપૂર્વ વડાપ્રધાને જે રીતે બહુમતી ગુમાવ્યા પછી, એક પખવાડિયા સુધી પદ પર રહેવા માટે બંધારણીય મર્યાદાનો ભંગ કર્યો અને વિપક્ષની ટીકા કરી, વર્તમાન વડાપ્રધાન શાહબાઝ શરીફ સાથેના તેમના સંબંધો લગભગ સમાપ્ત થઈ ગયા પરંતુ તેમના પક્ષના સાથીદાર અને ભૂતપૂર્વ પાકિસ્તાની આંતરિક મંત્રી શેખ રાશિદ અહેમદે દાવો કર્યો છે કે તેઓ ટૂંક સમયમાં બંને નેતાઓનો પરિચય કરાવશે. શેખ રાશિદે કહ્યું કે પૂર્વ વડાપ્રધાન ઈમરાન ખાન વડાપ્રધાન શાહબાઝ શરીફ સાથે ટૂંક સમયમાં ચૂંટણી કરાવવા અંગે ચર્ચા કરવા તૈયાર છે. અવામી નેશનલ લીગ-પાકિસ્તાનના વડા રશીદ અહેમદે કહ્યું કે તેમણે શાસક પક્ષ અને વિરોધ પક્ષો વચ્ચે “ગેરસમજણો” દૂર કરવાના પ્રયાસો શરૂ કર્યા છે. અવામી નેશનલ લીગ-પાકિસ્તાન એ પાકિસ્તાન તહરીક-એ-ઈન્સાફ (પીટીઆઈ)ની મુખ્ય ગઠબંધન સહયોગી છે. “મેં તેમની (પીટીઆઈ અને શાસક પાકિસ્તાન મુસ્લિમ લીગ-નવાઝ) વચ્ચેની ગેરસમજને દૂર કરવાના પ્રયાસો શરૂ કર્યા છે. તેમણે કહ્યું, હું શાંતિ માટે સેનાની સાથે છું, પરંતુ ‘યુદ્ધ’ની સ્થિતિમાં હું ઈમરાન ખાનની સાથે ઉભો રહીશ. ખાન શરીફ સરકાર સાથે ટૂંક સમયમાં સામાન્ય ચૂંટણી યોજવા અંગે વાતચીત કરવા માટે તૈયાર છે. દેશના ૨૨માં વડાપ્રધાન ઈમરાન ખાન (૬૯)ને એપ્રિલની શરૂઆતમાં અવિશ્વાસના મત દ્વારા પદ પરથી હટાવી દેવામાં આવ્યા હતા. પીએમએલ-એનના નેતા શાહબાઝ શરીફ (૭૦)એ ૧૧ એપ્રિલે વડાપ્રધાન પદ સંભાળ્યું હતું. વર્તમાન ગૃહની મુદત ઓગસ્ટ ૨૦૨૩માં સમાપ્ત થશે. શેખ રશીદ ભલે દાવો કરે કે બંને નેતાઓને એકસાથે લાવવામાં આવશે, પરંતુ તે એટલું સરળ નથી. વિશ્વાસ મત દરમિયાન ઈમરાન ખાને અપનાવેલી યુક્તિ શાહબાઝ શરીફ ભૂલ્યા નથી. એક દિવસ પહેલા જ પાકિસ્તાનમાં ઈમરાન ખાન અને પીટીઆઈના અન્ય ઘણા નેતાઓ વિરુદ્ધ હ્લૈંઇ નોંધવામાં આવી છે. જ્યારે શાહબાઝ શરીફ સાઉદી અરેબિયામાં મદીના ગયા ત્યારે કેટલાક લોકોએ તેમને ચોર અને દેશદ્રોહી કહીને સૂત્રોચ્ચાર કર્યા હતા. સાઉદી પોલીસે આ ઘટનામાં પાંચ પાકિસ્તાનીઓની ધરપકડ કરી છે. પાકિસ્તાન સરકારનું કહેવું છે કે આ ઘટનામાં ઈમરાન ખાન સામેલ છે. આથી પાકિસ્તાનની પંજાબ પોલીસે ખાન અને તેમના પક્ષના લગભગ ૧૫૦ લોકો વિરુદ્ધ કેસ નોંધ્યો છે.
