સાઉદી અરેબિયા અકુશળ કામદારોને દેશમાં આવતા અટકાવવા માટે તેના વિઝા નિયમો કડક કરી રહ્યું છે. હવે કિંગડમે જાહેરાત કરી છે કે તે ૧૬૦થી વધુ દેશો માટે તેનો વ્યાવસાયિક ચકાસણી કાર્યક્રમ લાગુ કરવા જઈ રહ્યું છે. તેનો અર્થ એ કે આ દેશોમાંથી આવતા તમામ સ્થળાંતર કામદારોએ વેરિફિકેશન પ્રોગ્રામની કસોટી પાસ કરવી પડશે. સાઉદી શ્રમ અધિકારીઓનું કહેવું છે કે આ પગલાનો હેતુ શ્રમ બજારને નિયંત્રિત કરવાનો છે અને અકુશળ કામદારોને રાજ્યમાં આવતા અટકાવીને કુશળ કામદારો લાવવાનો છે.
આ વર્ષની શરૂઆતમાં સાઉદી અરેબિયાના માનવ સંસાધન મંત્રાલય દ્વારા વિદેશ મંત્રાલયના સહયોગથી પ્રોફેશનલ વેરિફિકેશન પ્રોગ્રામ લાગુ કરવામાં આવ્યો હતો. તે અત્યાર સુધીમાં ૬૨ દેશો માટે લાગુ કરવામાં આવ્યું છે. આ પ્રોગ્રામમાં બે પ્રકારના પરીક્ષણોનો સમાવેશ થાય છે – વ્યવહારુ અને સૈદ્ધાંતિક. લેબર વિઝા મેળવવા માટે, તમારે પહેલા આ બંને ટેસ્ટ પાસ કરવી પડશે, તો જ વિદેશીઓને સાઉદી અરેબિયાના વિઝા મળશે. ભારતમાંથી લાખો કામદારો કામની શોધમાં સાઉદી અરેબિયા જાય છે.
સાઉદી સરકારના કોઈપણ ર્નિણયની ભારત પર મોટી અસર પડે છે. જ્યારે સાઉદીએ સૌપ્રથમ વ્યાવસાયિક વેરિફિકેશન પ્રોગ્રામ શરૂ કર્યો, ત્યારે ભારત એવા પ્રથમ દેશોમાં હતું કે જેના કામદારો આ વેરિફિકેશન પ્રોગ્રામ હેઠળ સાઉદી જઈ રહ્યા હતા.. સાઉદી અરેબિયાના માનવ સંસાધન મંત્રાલયના આ કાર્યક્રમના વડા નવાફ અલ અયાદીએ કહ્યું કે આ કાર્યક્રમ પ્લમ્બિંગ, વીજળી વગેરે જેવા વ્યવસાયોમાં કામ કરતા કામદારો માટે છે. તે ચાર મુખ્ય દેશો – ભારત, બાંગ્લાદેશ, શ્રીલંકા અને પાકિસ્તાનમાં લોન્ચ કરવામાં આવ્યું છે. સાઉદીના કુલ ઈમિગ્રન્ટ્સમાં આ ચાર દેશોના ઈમિગ્રન્ટ્સનો હિસ્સો ૮૦ ટકા છે. તેમણે કહ્યું કે આ કાર્યક્રમ હેઠળ કામદારોની ડિગ્રી અસલી છે કે નહીં તેની પણ તપાસ કરવામાં આવે છે. આ પ્રોગ્રામ હાલમાં ૬૨ દેશો માટે શરૂ કરવામાં આવ્યો છે અને તેનું લક્ષ્ય ૧૬૦ દેશોને આવરી લેવાનું છે.
આ પહેલા સાઉદી અરેબિયાએ તેના વિઝા નિયમો કડક બનાવવાનું પગલું ભર્યું હતું. સાઉદી સરકારે વિદેશી ઘરેલુ કામદારોની ભરતીને લઈને તેના વિઝા નિયમોમાં ફેરફાર કર્યો હતો. નવેમ્બરમાં અનાવરણ કરાયેલા નવા નિયમો હેઠળ, સાઉદી અરેબિયાના અપરિણીત પુરુષ અથવા સ્ત્રી નાગરિકો ૨૪ વર્ષના થયા પછી જ ઘરેલું કામ માટે વિદેશી કામદારોને રાખી શકે છે. એવું માનવામાં આવે છે કે આ ર્નિણયની ભારત પર વધુ અસર પડશે કારણ કે ભારતમાંથી મોટી સંખ્યામાં ઘરેલુ કામદારો સાઉદી અરેબિયા જાય છે. ઘરેલું કામદારોમાં નોકરો, ક્લીનર્સ, ડ્રાઇવર, રસોઈયા, ગાર્ડ, ખેડૂતો, દરજીઓ, લિવ-ઇન નર્સ અને ટ્યુટરનો સમાવેશ થાય છે.
