જામનગર જિલ્લાના ધ્રોલ તાલુકામાં આવેલી ઐતિહાસિક ભૂચરમોરી રણભૂમિ નજીક લાંબા સમયથી જર્જરિત અને બિનઉપયોગી બનેલા પાણીના ટાંકાને વહીવટી તંત્ર દ્વારા ડિમોલિશ કરવામાં આવ્યો છે. આસપાસના લોકો તથા વાહનચાલકોની સુરક્ષાને ધ્યાને રાખી તંત્રએ આ જોખમી બાંધકામ દૂર કર્યું છે.
આ પાણીનો ટાંકો દાયકાઓ જૂનો હોવાના કારણે તેના સ્લેબ અને પિલરો અત્યંત જર્જરિત થઈ ગયા હતા. ટાંકો ગમે ત્યારે ધરાશાયી થઈને કોઈ મોટી જાનહાનિ નોતરે તેવો ભય સ્થાનિકો અને રાહદારીઓમાં સતત સતાવી રહ્યો હતો.
સ્થાનિક વહીવટી તંત્રની વિશેષ ટીમે સ્થળ પર પહોંચીને જરૂરી કાયદાકીય અને સુરક્ષા વ્યવસ્થા ગોઠવી હતી. ત્યારબાદ આ જોખમી ટાંકાને કાળજીપૂર્વક અને સુરક્ષિત રીતે જમીનદોસ્ત કરી દેવામાં આવ્યો હતો.
આ જોખમી ટાંકો દૂર થતાં અકસ્માતનો મોટો ખતરો ટળ્યો છે, જેનાથી સ્થાનિક રહીશો અને માર્ગ પરથી પસાર થતાં વાહનચાલકોએ રાહતનો શ્વાસ લીધો છે અને તંત્રની ત્વરિત કાર્યવાહીને બિરદાવી છે.