ગુજરાતમાં આંતરરાજ્ય ટ્રેનો મારફતે થતી માદક પદાર્થોની હેરાફેરી રોકવા માટે પોલીસ મહાનિર્દેશક ડો. કે.એલ.એન.રાવ અને અન્ય ઉચ્ચ અધિકારીઓના માર્ગદર્શન હેઠળ સુરત રેલવે સ્ટેશન વિસ્તારમાં સઘન ચેકિંગ હાથ ધરવામાં આવ્યું હતું. આ કામગીરી દરમિયાન 21 માર્ચના રોજ વહેલી સવારે ટ્રેન નં. 12843 પુરી-અમદાવાદ એક્સપ્રેસમાં એસ.ઓ.જી. અને એન.ડી.પી.એસ. ડેડીકેટેડ ટીમ દ્વારા પેટ્રોલિંગ કરવામાં આવ્યું હતું.
વિમલના થેલાની તપાસ કરતા ગાંજો નીકળ્યો જ્યારે આ ટ્રેન રાત્રે 02:19 વાગે નિયોલ રેલવે સ્ટેશન પાસે પહોંચી, ત્યારે પોલીસ ટીમને રિઝર્વેશન કોચ નં. S/6 અને જનરલ કોચની વચ્ચેથી એક બેકપેક અને એક વિમલનો થેલો મળી આવ્યો હતો.
આ ઉપરાંત, કોચ નં. A/1 અને પાછળના જનરલ કોચના કોરીડોર વચ્ચેથી પણ એક અન્ય બેકપેક મળી આવ્યું હતું. આ થેલાઓની તપાસ કરતા તેમાંથી કુલ 23.895 કિલોગ્રામ ગાંજાનો જથ્થો મળી આવ્યો હતો, જેની અંદાજિત કિંમત રૂપિયા 11,94,750 જેટલી થાય છે.
આરોપી જથ્થો મુકી ફરાર પોલીસના જણાવ્યા અનુસાર, કોઈ અજાણ્યો ઈસમ આ માદક પદાર્થનો જથ્થો આર્થિક લાભ માટે પરપ્રાંતમાંથી ગેરકાયદેસર રીતે લાવ્યો હતો, પરંતુ પોલીસ ચેકિંગના ડરથી તે આ જથ્થો બિનવારસી હાલતમાં મૂકીને નાસી છૂટ્યો હતો. આ અંગે હેડ કોન્સ્ટેબલ રાજેન્દ્રસિંહ કરશનભાઈ દ્વારા ફરિયાદ નોંધાવતા સુરત રેલવે પોલીસ સ્ટેશનમાં એન.ડી.પી.એસ. એક્ટની કલમ 8(સી) અને 20(બી-ii)સી મુજબ ગુનો દાખલ કરવામાં આવ્યો છે.