રાજકોટમાં નાગરિકોના આરોગ્ય સાથે ચેડા કરતા અને ભેળસેળયુક્ત તેમજ પ્રતિબંધિત ખાદ્ય પદાર્થોનું ઉત્પાદન, સંગ્રહ તથા વેચાણ કરતા તત્વો સામે પોલીસે લાલ આંખ કરી છે. લોકસ્વાસ્થ્યની સુરક્ષાને પ્રાથમિકતા આપીને આવી ગેરકાયદેસર પ્રવૃત્તિઓ પર રોક લગાવવા માટે તંત્ર દ્વારા ખાસ ઝુંબેશ ચલાવવામાં આવી રહી છે.
ઝુંબેશના ભાગરૂપે SOG અને ફૂડ વિભાગ દ્વારા હાથ ધરવામાં આવેલા સંયુક્ત ઓપરેશનમાં પ્રતિબંધિત એનાલોગ પનીર અને ચીઝનો મોટો જથ્થો ઝડપી પાડવામાં સફળતા મળી છે. પોલીસે 550 કિલો જથ્થાનો નાશ કરી જરૂરી નમુના લેબોરેટરી ખાતે મોકલાવી પેઢી સંચાલક 53 વર્ષીય અશોકભાઇ જેન્તલાલ દલવાડી સામે કાયદેસરની કાર્યવાહી હાથ ધરી છે.
પ્રતિબંધિત એનાલોગ પનીર, ચીઝનું ઉત્પાદન અને સંગ્રહ પોલીસ વિભાગને મળેલી બાતમીના આધારે આ સમગ્ર કામગીરી પાર પાડવામાં આવી હતી. આજે એસઓજી વિભાગની ટીમ જ્યારે વિસ્તારમાં પેટ્રોલીંગમાં હતી, ત્યારે તેમને ચોક્કસ માહિતી મળી હતી કે અણીયારા ગામ પાસે આવેલા ડી.કે. ઇન્ડ્રસ્ટ્રીયલ એરીયાના પ્લોટ નંબર 2માં આવેલ ‘ગોવાલીયા ફુડ પ્રોડક્ટ’ નામની ફેક્ટરીમાં માનવ આરોગ્ય માટે હાનિકારક અને પ્રતિબંધિત એવા એનાલોગ પનીર તથા ચીઝનું ઉત્પાદન અને સંગ્રહ કરવામાં આવી રહ્યો છે.
ગોવાલીયા ફુડ પ્રોડક્ટના સંચાલક વિરુદ્ધ કાર્યવાહી શરૂ બાતમીના આધારે પોલીસ ટીમે ત્વરિત કાર્યવાહી કરીને કાયદાકીય પ્રોટોકોલ મુજબ ફૂડ વિભાગના અધિકારીને સાથે રાખીને ફેક્ટરી પર સરપ્રાઈઝ રેડ કરી હતી. દરોડા દરમિયાન ફેક્ટરીમાંથી મોટા પ્રમાણમાં બિનઅધિકૃત એનાલોગ ચીઝ અને પનીરનો સ્ટોક મળી આવ્યો હતો.
તપાસ દરમિયાન ગોવાલીયા ફુડ પ્રોડક્ટના સંચાલક રાજકોટનાં 53 વર્ષીય અશોકભાઇ જેન્તલાલ દલવાડી હોવાનું સામે આવ્યું હતું. જેને લઈ પોલીસે ફૂડ વિભાગ અધિકારીઓની મદદથી ફેક્ટરીમાંથી ખાદ્ય પદાર્થોના જરૂરી સેમ્પલ લઈને તેને આગળની ચકાસણી માટે લેબોરેટરીમાં મોકલવામાં આવ્યા છે અને કાયદેસરની ધોરણસરની કાર્યવાહી હાથ ધરવામાં આવી છે.