સ્વાતંત્ર્ય પર્વની પૂર્વ સંધ્યાએ જામનગરમાં ભવ્ય તિરંગા યાત્રાનું આયોજન કરવામાં આવ્યું હતું. આ યાત્રામાં હજારોની સંખ્યામાં નગરજનો ઉમટી પડ્યા હતા, જેના કારણે સમગ્ર શહેર દેશભક્તિના રંગે રંગાઈ ગયું હતું.
આ વિશાળ તિરંગા યાત્રામાં નાના બાળકોથી લઈને વડીલો સુધીના હજારો નાગરિકોએ ઉત્સાહભેર ભાગ લીધો હતો. હાથમાં રાષ્ટ્રધ્વજ સાથે “ભારત માતા કી જય” અને “વંદે માતરમ”ના નારાઓથી શહેરના માર્ગો ગુંજી ઉઠ્યા હતા.
આ યાત્રામાં જામનગરના સાંસદ પૂનમબેન માડમ, સ્થાનિક ધારાસભ્યો, ઉચ્ચ અધિકારીઓ તેમજ પોલીસ અને NCCના જવાનો પણ વિશેષ રૂપે જોડાયા હતા. જવાનોની શિસ્તબદ્ધ ઉપસ્થિતિએ યાત્રાની શોભામાં વધારો કર્યો હતો. તિરંગા યાત્રા શહેરના મુખ્ય માર્ગો પરથી પસાર થઈ ત્યારે સ્થાનિક વેપારીઓ અને નગરજનો દ્વારા પુષ્પવર્ષા કરીને તેનું ઉષ્માભેર સ્વાગત કરવામાં આવ્યું હતું. અનેક સ્થળોએ દેશભક્તિના ગીતો અને સાંસ્કૃતિક ઝાંખીઓ પણ આકર્ષણનું કેન્દ્ર બની હતી.