જૂનાગઢ તાલુકાના વડાલ ગામે ભરવાડપા વિસ્તારમાં રહેણાંક મકાનની બાજુમાં ચાલતા વરલી મટકા અને આંક ફરકના એક મોટા ગેરકાયદેસર જુગારધામ પર સ્ટેટ મોનીટરીંગ સેલ (SMC) એ સફળ દરોડો પાડ્યો છે. આ રેઇડ દરમિયાન પોલીસે જુગાર રમતા અને રમાડતા કુલ 17 શખ્સોને રંગેહાથ ઝડપી લીધા છે, જ્યારે જુગારધામનો મુખ્ય માલિક અને પોરબંદરનો આંકડા કાપનાર શખ્સ સહિત 3 આરોપીઓ ફરાર જાહેર કરાયા છે.
પોલીસની આ કાર્યવાહીમાં જુગારના પટમાંથી તેમજ શખ્સો પાસે કુલ 3,47,865/-નો મુદ્દામાલ જપ્ત કરવામાં આવ્યો છે, જેમાં રૂ. 1,36,665/- ની રકમ, 14 નંગ મોબાઈલ ફોન, 4 મોટરસાયકલ અને હિસાબ કરવા માટેના કેલક્યુલેટર તથા અન્ય સાહિત્યનો સમાવેશ થાય છે. સ્થાનિક પોલીસ તંત્રને અંધારામાં રાખીને કરવામાં આવેલી આ મોટી કાર્યવાહીથી જૂનાગઢ પંથકના જુગારીઓમાં ફફડાટ વ્યાપી ગયો છે.
જુગારના અડ્ડા પર નાસભાગ મચી ગઈ હતી સ્ટેટ મોનીટરીંગ સેલના ગુલાબસિંહ રૂમાલજી તરારને વડાલ ગામમાં મોટા પાયે જુગાર રમાતો હોવાની ચોક્કસ બાતમી મળી હતી. આ બાતમીના આધારે વડાલથી ભીયાદ રોડ પર આવેલા ભરવાડપા ઉપરવાસ વિસ્તારમાં એક રહેણાંક મકાનની બાજુમાં આવેલી ખુલ્લી જગ્યામાં ઓચિંતો દરોડો પાડવામાં આવ્યો હતો. પોલીસની આ કાર્યવાહીથી જુગારના અડ્ડા પર નાસભાગ મચી ગઈ હતી. ઘટનાસ્થળેથી બહારના વિસ્તારમાંથી આવેલા માણસો પૈસાની હાર-જીતનો વરલી મટકા અને આંક ફરકનો સંગઠિત જુગાર રમતા રંગેહાથ પકડાઈ ગયા હતા.