૬૬મી નેશનલ ડિફેન્સ કોલેજ કોર્સના ફેકલ્ટી અને કોર્સના સભ્યોએ રાષ્ટ્રપતિ ભવન ખાતે ભારતના રાષ્ટ્રપતિ શ્રીમતી દ્રૌપદી મુર્મુ સાથે મુલાકાત કરી હતી.
આ અવસર પર રાષ્ટ્રપતિએ પોતાના સંબોધનમાં જણાવ્યું હતું કે સુરક્ષા અને તકનીકી પરિદ્રશ્ય ઝડપથી બદલાઈ રહ્યા છે, જે નવા અને જટિલ પડકારો લાવી રહ્યા છે. આ વિકાસ માટે વધુ સજ્જતા, વ્યૂહાત્મક દૂરદર્શિતા અને બદલાતી પરિસ્થિતિઓ સાથે અનુકૂલન સાધવાની ક્ષમતા જરૂરી છે. ઝડપી ર્નિણય લેવાની વ્યવસ્થા પણ વધુ મહત્વપૂર્ણ બની રહી છે કારણ કે આધુનિક યુદ્ધ તકનીકો પરંપરાગત ક્ષેત્રો ઉપરાંત સાયબર સુરક્ષા, સ્પેસ ટેકનોલોજી અને બાયોટેકનોલોજીમાં વિસ્તરી છે.
રાષ્ટ્રપતિએ જણાવ્યું હતું કે આજે રાષ્ટ્રીય સુરક્ષા માત્ર સૈન્ય ક્ષમતાઓથી પર છે. ઈનોવેશનને વ્યવહારુ ઉકેલોમાં રૂપાંતરિત કરવા માટે વૈજ્ઞાનિક સંસ્થાઓ અને શસ્ત્રદળો વચ્ચે મજબૂત સહયોગ જરૂરી છે. તાજેતરના સંઘર્ષોએ ખર્ચ-અસરકારક તકનીકોના મહત્વ પર પ્રકાશ પાડ્યો છે જે અદ્યતન સંરક્ષણ પ્રણાલીઓને પૂરક બનાવે છે અને ઉપલબ્ધ સંસાધનોનો શ્રેષ્ઠ ઉપયોગ કરે છે. તેમણે ઈનોવેશન અને રાષ્ટ્રીય સુરક્ષા વચ્ચેની કડીને મજબૂત કરવા માટે સંશોધન, વિકાસ અને ઈનોવેશન યોજના જેવી સરકારી પહેલોના મહત્વ પર ભાર મૂક્યો હતો.
રાષ્ટ્રપતિએ જણાવ્યું હતું કે વિજ્ઞાન, રાષ્ટ્રીય સુરક્ષા અને આર્થિક પ્રવૃત્તિઓના વિવિધ ક્ષેત્રોમાં આર્ટિફિશિયલ ઇન્ટેલિજન્સનો ઉપયોગ વધી રહ્યો છે. તેમણે કહ્યું કે ર્નિણય લેવાની પ્રક્રિયા માત્ર આ ટેકનોલોજી પર છોડી શકાય નહીં અને સંતુલિત અભિગમની જરૂરિયાત પર ભાર મૂક્યો હતો.
રાષ્ટ્રપતિએ રેખાંકિત કર્યું કે આર્થિક સ્થિતિસ્થાપકતા એ રાષ્ટ્રીય સુરક્ષા માળખાનું એક અભિન્ન અંગ છે. તેમણે કહ્યું કે ભારતીય અર્થતંત્રે બાહ્ય પરિબળો દ્વારા ઊભા થયેલા વિક્ષેપોને સહન કરવાની પોતાની ક્ષમતાઓ દર્શાવી છે. ભારતે વ્યૂહાત્મક કાર્ય-સ્વતંત્રતા સાથે બાંધછોડ કર્યા વિના આ હાંસલ કર્યું છે.