દેશમાં હાહાકાર મચાવનારી કોરોનાની બીજી લહેર વખતે ઓક્સિજનની કમીથી કોઈનું મોત નથી થયું તેવા સરકારના દાવાઓ પર સંસદના ચોમાસુ સત્રમાં મચેલી ધમાલ વચ્ચે હવે સીએમ રુપાણીએ પણ કંઈક આવો જ દાવો કર્યો છે. રુપાણીએ આજે જણાવ્યું હતું કે, ગુજરાતમાં પણ ઓક્સિજનની કમીથી કોરોનાના એકેય દર્દીનું મોત નથી થયું. રુપાણીએ આજે જૂનાગઢમાં પત્રકારો સાથે વાત કરતા કહ્યું હતું કે, ગુજરાતમાં સાડા આઠ લાખ લોકોએ કોરોનાની સારવાર લીધી હતી જેમાંથી સવા આઠ લાખથી વધુ લોકો સાજા થઈને ઘરે પણ જતા રહ્યા છે.સીએમે જણાવ્યું હતું કે રાજ્યમાં અનેક શહેરોમાં કોરોનાની ડેઝિગ્નેટેડ હોસ્પિટલ હતી. જાેકે, એકેય હોસ્પિટલમાં એવો બનાવ નથી બન્યો કે જેમાં ઓક્સિજનની કમીને કારણે કોઈનું મોત થયું હોય. કોઈ હોસ્પિટલમાં ઓક્સિજન ના પહોંચવાથી દર્દીઓના મોત થયાની ઘટના ના બની હોવાનો દાવો કરતાં રુપાણીએ કહ્યું હતું કે વિપક્ષ પાસે કોઈ મુદ્દા ના હોવાથી તે લોકોને ભ્રમિત કરવા જૂઠ્ઠી વાતો કરે છે. ઉલ્લેખનીય છે કે, કોરોનાની બીજી લહેરે ગુજરાતમાં પણ કાળો કહેર વર્તાવ્યો હતો, અને મોટા શહેરોમાં તો હોસ્પિટલમાં એડમિટ થવા દર્દીને કલાકો સુધી વેઈટિંગમાં રહેવું પડે તેવી સ્થિતિ હતી.
કોરોનાની બીજી લહેર દરમિયાન સરકારી ચોપડે નોંધાતા કોરોનાથી મોતને ભેટેલા દર્દીઓના આંકડા અને વાસ્તવિક સ્થિતિ વચ્ચેનો ભેદ પણ ચર્ચાસ્પદ બન્યો હતો. એક તરફ સરકાર આંકડા ઓછા બતાવતી હતી, તો બીજી તરફ સ્મશાનોમાં કલાકોનું વેઈટિંગ ચાલતું હોવાના દ્રશ્યો કંઈક અલગ જ વાતની સાબિતી આપતા હતા. તેવી જ રીતે કેટલીક હોસ્પિટલોમાં ઓક્સિજનનું પ્રેશર ઓછું થઈ જતાં દર્દીઓ તડપી રહ્યા હોય તેવા કેટલાક વિડીયો પણ આ ગાળામાં વાયરલ થયા હતા. જોકે, સરકાર પહેલાથી જ ઓક્સિજનની કમી હોવાનો ઈનકાર કરતી રહી હતી.
હાલની સ્થિતિ અનુસાર, રાજ્યમાં કોરોનાના કુલ ૮ લાખ ૧૪ હજાર દર્દીઓ જુદી-જુદી હોસ્પિટલોમાંથી સારવાર લઈને ડિસ્ચાર્જ થયા છે, જ્યારે સરકારી આંકડા અનુસાર, કોરોનાથી અત્યારસુધી ૧૦,૦૭૬ લોકોનાં મોત થયા છે. રાજ્યમાં હાલ કેસોમાં સતત ઘટાડો થઈ રહ્યો છે, અને મોટાપાયે રસીકરણ અભિયાન પણ ચલાવાઈ રહ્યું છે. જાેકે, રસીનો પૂરતો સપ્લાય ના આવતો હોવાથી ક્યાંક-ક્યાંક રસી લેવા લોકોને કલાકો સુધી લાઈનોમાં ઉભું પડતું હોવાની ઘટના પણ સામે આવતી રહે છે. થોડા સમય પહેલા તો કેટલાક દિવસો સુધી રસીકરણ સદંતર બંધ કરવાની પણ ફરજ પડી હતી.
