ગુજરાતમાં છેલ્લા કેટલાક સમયથી ચાંદીપુરા વાયરસનો કહેર સતત યથાવત જોવા મળી રહ્યો છે, ત્યારે આજે વધુ 4 શંકાસ્પદ દર્દીઓ સામે આવ્યા છે. જેને પગલે સારવાર લઈ રહેલા કુલ દર્દીઓની સંખ્યા 10 પર પહોંચી છે. આ પૈકી 2 દર્દીઓનાં રિપોર્ટ પોઝિટિવ આવી ચુક્યા છે. જ્યારે 8 શંકાસ્પદ દર્દીઓનાં નમુના લેબોરેટરીમાં મોકલાયા હોવાથી તેના રિપોર્ટની રાહ જોવાઈ રહી છે.
મળતી માહિતી અનુસાર ગઈકાલે સૌપ્રથમ વખત 18 વર્ષના યુવાનમાં ચાંદીપૂરાના લક્ષણ મળી આવ્યા હતા. યુવકના સેમ્પલ લઈ લેબોરેટરીમાં મોકલ્યા બાદ તેને ઓબ્ઝર્વેશન હેઠળ રાખવામાં આવ્યો છે.
યુવાન વાંકાનેરનો રહેવાસી હોવાનું અને 20 દિવસ પહેલા દ્વારકા તેમજ 4 દિવસ પહેલા તરણેતર ગયો હોવાનું સામે આવ્યું હતું. જોકે આ યુવાનમાં લક્ષણો કઈ રીતે આવ્યા તે અંગે તપાસ કરાઈ રહી છે. સામાન્ય રીતે 0થી 14 વર્ષના બાળકોમાં જોવા મળતા ચાંદીપુરા અને એન્કેફેલાઈટીસના લક્ષણો સરખા હોય છે, ત્યારે આ યુવાનને એન્કેફેલાઈટીસ હોવાની પૂરી શક્યતા છે. જોકે સાવચેતીના ભાગરૂપે તેનો ચાંદીપુરાનો રિપોર્ટ કરવા માટે નમુના મોકલી આપવામાં આવ્યા છે.
સિવિલ હોસ્પિટલના મીડિયા કો-ઓર્ડીનેટર ડો. હેતલ ક્યાડાનાં જણાવ્યા મુજબ આજે વધુ 4 નવા શંકાસ્પદ કેસ સામે આવ્યા છે. આ તમામ બાળકોમાં ચાંદીપુરાનાં લક્ષણો જોવા મળ્યા હતા. જેને પગલે તમામનાં સેમ્પલ લઈને લેબોરેટરીમાં મોકલી આપવામાં આવ્યા છે. જોકે અત્યાર સુધી માત્ર બે દર્દીઓનાં રિપોર્ટ પોઝિટીવ આવી ચુક્યો છે.
બાકીના સેમ્પલ પૈકીનાં રિપોર્ટ ટૂંક સમયમાં આવશે. હાલ 8 શંકાસ્પદ અને 2 પોઝીટીવ કેસ સહિત કુલ 10 દર્દીઓ સારવાર હેઠળ છે.