અમદાવાદ
રાજ્યમાં સૌથી વધુ વસ્તી ધરાવતા અમદાવાદમાં ગત શુક્રવારે માસ્ક ન પહેરવા બદલ ૩૮૫ લોકોને દંડ ફટકારાયો હતો.. જ્યારે રાજકોટમાં જાહેર સ્થળોએ માસ્ક વગર પકડાયેલા ૧૦૭ લોકોને દંડ ફટકારાયો હતો.કોરોના મહામારી શરૂ થયા બાદ અત્યાર સુધી અમદાવાદમાં ૧ લાખથી વધુ લોકોની ધરપકડ થઈ ચૂકી છે.. શહેર પોલીસના રેકોર્ડ મુજબ, કોવિડ નિયમોના ઉલ્લંઘન બદલ ૧ લાખ ૯૦ જેટલા લોકોની ધરપકડ કરવામાં આવી છે. ધરપકડનો આ આંકડો ૨૪ જૂન, ૨૦૨૦થી ૩ ડિસેમ્બર, ૨૦૨૧ સુધીનો છે. નિયમોના ઉલ્લંઘનમાં સોશિયલ ડિસ્ટન્સનો અભાવ, માસ્ક ન પહેરવું, કરફ્યૂના કલાકો દરમિયાન બહાર નીકળવું અને લૉકડાઉન અમલમાં હોય ત્યારે બહાર નીકળવાની ઘટનાઓ સામેલ છે. આનો અર્થ એ છે કે રોગચાળો શરૂ થયો ત્યારથી નિયમોનું ઉલ્લંઘન કરવા બદલ દરરોજ સરેરાશ ૧૯૧ લોકોની ધરપકડ કરવામાં આવી હતી. તો બીજીતરફ ઓમિક્રોનના ખતરાને લઈ રાજ્ય સરકાર ફરી એકવાર કોવિડ પ્રોટોકોલના કડક અમલીકરણ અંગે વિચારણા કરી રહી છે. પણ પોલીસ વિભાગના આંકડા જ કોરોના ગાઈડલાઈનના અમલીકરણમાં શિથિલતા દર્શાવે છે..પોલીસ વિભાગના આંકડા પ્રમાણે, કોરોનાની બીજી લહેર દરમિયાન એક જ દિવસમાં રાજ્યમાં લગભગ ૧૩ હજાર લોકોને માસ્ક ન પહેરવા બદલ દંડ કરાયો હતો.
