રાજકોટ જિલ્લાના જેતપુરમાં કાયદો અને વ્યવસ્થાની સ્થિતિ જાણે કથળી હોય તેમ છેલ્લા ૧૨ કલાકમાં હત્યાની બે ચોંકાવનારી ઘટનાઓ સામે આવી છે. શનિવાર (૧૦મી જાન્યુઆરી) સાંજથી રવિવાર (૧૧મી જાન્યુઆરી) સવાર સુધીમાં બનેલી આ ઘટનાઓએ સમગ્ર પંથકમાં ચકચાર મચાવી દીધી છે. પોલીસે એક કેસમાં આરોપીની ધરપકડ કરી છે, જ્યારે બીજા રહસ્યમય કેસમાં તપાસ તેજ કરી છે.
જેતપુરના ભોજાધાર વિસ્તારમાં કૌટુંબિક કલેશ લોહિયાળ સાબિત થયો છે. વતનથી પોતાની પુત્રીના ઘરે મહેમાન બનીને આવેલા એક પરપ્રાંતિય દંપતી વચ્ચે કોઈ કારણોસર ઉગ્ર ઝઘડો થયો હતો. ઉશ્કેરાયેલા પતિએ પોતાની પત્ની પર છરીના ઘા ઝીંકીને તેની હત્યા કરી નાખી હતી. માતાને બચાવવા વચ્ચે પડેલી પુત્રીને પણ ગંભીર ઈજાઓ પહોંચી છે, જે હાલ હોસ્પિટલમાં સારવાર હેઠળ છે. જેતપુર સિટી પોલીસે ગણતરીના કલાકોમાં આરોપી પતિની ધરપકડ કરી કાયદેસરની કાર્યવાહી હાથ ધરી છે.
બીજી ઘટના એમ.જે. ઉદ્યોગનગર વિસ્તારમાં સામે આવી છે. રબારીકા રોડ પર આવેલી એક અવાવરું ઓરડીમાંથી એક અજાણી મહિલાની શંકાસ્પદ હાલતમાં મૃતદેહ મળી આવ્યો હતો. મહિલાનો મૃતદેહ ચાદરમાં બાંધેલી હાલતમાં મળી આવ્યો છે, જે દર્શાવે છે કે પુરાવાનો નાશ કરવા અથવા લાશને છુપાવવા પ્રયાસ થયો છે. પોલીસે મૃતદેહનો કબજાે મેળવી પોસ્ટમોર્ટમ માટે ખસેડ્યો છે. પ્રાથમિક દ્રષ્ટિએ આ આડા સંબંધો કે અંગત અદાવતમાં થયેલી હત્યા હોવાનું મનાય છે.
શહેરમાં ઉપરાઉપરી થયેલી બે હત્યાઓને પગલે સ્થાનિકોમાં ફફડાટ વ્યાપી ગયો છે. ઉદ્યોગનગર વિસ્તારના તમામ સીસીટીવી (ઝ્રઝ્ર્ફ) ફૂટેજ તપાસવામાં આવી રહ્યા છે. અજાણી મહિલાની ઓળખ મેળવવા માટે આસપાસના કારખાનાઓમાં પૂછપરછ શરૂ કરી છે. ગુના સ્થળેથી મળી આવેલા પુરાવા આધારે શકમંદોની અટકાયત કરવાની તજવીજ હાથ ધરાઈ છે.