જામનગર, જેને ‘છોટીકાશી’ તરીકે પણ ઓળખાય છે, ત્યાં રામનવમીના પવિત્ર તહેવાર નિમિત્તે 45મી ભવ્ય રામ સવારીનું આયોજન કરવામાં આવ્યું હતું. હિન્દુ ઉત્સવ સમિતિ અને મહાદેવ હર મિત્ર મંડળ ચેરીટેબલ ટ્રસ્ટ દ્વારા આયોજિત આ શોભાયાત્રામાં ઐતિહાસિક જનમેદની ઉમટી પડી હતી.
આ રામ સવારીનો પ્રારંભ તળાવની પાળ પર આવેલા સુપ્રસિદ્ધ બાલા હનુમાનજીના મંદિરેથી થયો હતો. તે હવાઇ ચોક, સેતાવાડ, સેન્ટ્રલ બેંક, માંડવી ટાવર, બર્ધન ચોક, દરબાર ગઢ, ચાંદી બજાર, દિપક ટોકીઝ, રણજીત રોડ અને બેડી ગેટ જેવા શહેરના મુખ્ય માર્ગો પરથી પસાર થઈ હતી. રાત્રીના 12:30 વાગ્યે પંચેશ્વર ટાવર પાસે આવેલા ભગવાન શ્રી રામચંદ્રજીના મંદિરે તેનું સમાપન થયું હતું.
શોભાયાત્રાના સમગ્ર માર્ગ પર હજારો રામભક્તોએ ભગવાન શ્રી રામ, લક્ષ્મણ અને જાનકીજીની પાલખીના દર્શન કરીને ધન્યતા અનુભવી હતી. વિવિધ સંસ્થાઓ દ્વારા 13 જેટલા સુંદર અને આકર્ષક ફ્લોટ્સ તૈયાર કરવામાં આવ્યા હતા. રામભક્તોએ અંગ કસરતના દાવ અને હેરતભર્યા પ્રયોગો રજૂ કર્યા હતા, અને રામધૂનના નારા લગાવતા સમગ્ર ‘છોટીકાશી’ રામમય બની ગયું હતું.
આ 45મી રામ સવારીના પ્રારંભ પ્રસંગે બાલા હનુમાન મંદિરના પૂજારી, બાલા હનુમાન સંકીર્તન મંડળના પ્રમુખ અને અખિલ ગુજરાત લોહાણા જ્ઞાતિના પ્રમુખ જીતુભાઈ લાલ સહિત અન્ય ટ્રસ્ટીગણે પાલખીનું સ્વાગત અને પૂજન કર્યું હતું.