પંચમહાલ પોલીસે શ્રી ગોવિંદ ગુરુ યુનિવર્સિટીના સહયોગથી સાયબર સુરક્ષા, સોશિયલ મીડિયાની જવાબદારી અને કાનૂની જાગૃતિ પર એક વિશેષ કાર્યક્રમનું આયોજન કર્યું હતું. આ કાર્યક્રમનો મુખ્ય હેતુ ડિજિટલ યુગમાં વધતા સાયબર ગુનાઓ સામે જાગૃતિ લાવવા અને સોશિયલ મીડિયાના જવાબદારીપૂર્વક ઉપયોગને પ્રોત્સાહન આપવાનો હતો.
આ કાર્યક્રમમાં મોટી સંખ્યામાં વિદ્યાર્થીઓ, સોશિયલ મીડિયા ક્રિએટર્સ અને યુવાનો ઉપસ્થિત રહ્યા હતા. પંચમહાલ જિલ્લાના પોલીસ અધિક્ષક ડૉ. હરેશ દુધાત, શ્રી ગોવિંદ ગુરુ યુનિવર્સિટીના કુલપતિ પ્રો. (ડૉ.) હરિભાઈ આર. કટારિયા અને પંચમહાલ પોલીસના લીગલ એડવાઇઝરે ઉપસ્થિત રહી માર્ગદર્શન પૂરું પાડ્યું હતું.
વક્તાઓએ સાયબર ફ્રોડથી બચવાના ઉપાયો, સોશિયલ મીડિયાના જવાબદારીપૂર્વક ઉપયોગ અને સાયબર કાયદા તેમજ તેના કાનૂની પરિણામો વિશે વિસ્તૃત માહિતી પૂરી પાડી હતી. આ ઉપરાંત, સહભાગીઓને ગુજરાત પોલીસ સાથે ‘સાયબર મિત્ર’ તરીકે જોડાવાની તક વિશે પણ માહિતગાર કરાયા હતા.
કાર્યક્રમના સમાપન સમયે, પાત્ર સહભાગીઓને ઈ-સર્ટિફિકેટ એનાયત કરવામાં આવ્યા હતા. આ કાર્યક્રમથી યુવાનોમાં સાયબર સુરક્ષા પ્રત્યે જાગૃતિ જોવા મળી હતી અને સૌએ ડિજિટલ દુનિયાને વધુ સુરક્ષિત, જવાબદાર અને જાગૃત બનાવવાનો સંકલ્પ લીધો હતો.