સાબરમતી પોલીસે SP રિંગ રોડ પર હોટલ હિલ્લોકની સામે વિનવિક્સ કેફેમાં ગેરકાયદે ચાલતા હુક્કાબાર પર દરોડો પાડી કાર્યવાહી કરી છે. પોલીસને રેડ દરમિયાન બે હુક્કા ચાલુ હાલતમાં મળી આવ્યા હતા. જે ગ્રાહકો માટે રાખવામાં આવ્યા હતા. આ ઉપરાંત અન્ય 21 હુક્કા, નિકોટીન સહિત 37 હજારનો મુદ્દામાલ કબજે કરવામાં આવ્યો છે.
વિનવિક્સ કેફેમાંથી હુક્કા જપ્ત કરાયા સાબરમતી પોલીસ સ્ટેશનના PSI એચ.ડી.રાઓલ સહિતનો સ્ટાફ નાઈટ પેટ્રોલિંગમાં હતો. તે દરમિયાન મળેલી બાતમીના આધારે SP રિંગ રોડ પર હોટલ હિલ્લોક સામે અને નાયરા પેટ્રોલ પંપ પાછળ વિનવિક્સ કેફેમાં તપાસ કરવામાં આવી હતી.
પોલીસ તપાસ દરમિયાન કેફેના સંચાલક વિનિતભાઈ નરેન્દ્રભાઈ રાઠોડ (ઉંમર 37 વર્ષ,રહે.જગતપુર) હુક્કા ગ્રાહકોને પીરસવા માટે તૈયાર રાખ્યા હોવાનું મળી આવ્યું હતું. પોલીસે સ્થળ પરથી ચાલુ હાલતમાં બે હુક્કા ઝડપી લીધા હતા.
37 હજારનો મુદ્દમાલ જપ્ત કરવામાં આવ્યો દરોડા દરમિયાન પોલીસે 21 હુક્કા, તમાકુ ફ્લેવરના 9 ડબ્બા, સિલ્વર ફોઈલ પેપર, માટીની ચીલમ, કોલસા, નવી પાઇપ સહિતનો સામાન જપ્ત કર્યો છે જેની કિંમત 37,600 રૂપિયા હોવાનું પોલીસે જણાવ્યું છે. સાબરમતી પોલીસે આ મામલે જાણવા જોગ નોંધ કરી કાયદેસરની કાર્યવાહી હાથ ધરી છે.