ધ્રોલ તાલુકાના ગ્રામ્ય વિસ્તારોમાં ભારે વરસાદ નોંધાયો છે. ખાસ કરીને ઉંડ-1 ડેમ વિસ્તારમાં અંદાજે અઢી ઇંચ વરસાદ પડ્યો હતો. આ વરસાદને કારણે વોકળા અને નદીઓમાં નવા નીરની આવક થઈ હતી. ધ્રોલ શહેરમાં સવારથી વાદળછાયું વાતાવરણ હોવા છતાં વરસાદ પડ્યો ન હતો. જોકે, તાલુકાના ગ્રામ્ય વિસ્તારોમાં સવારે 8 વાગ્યાથી બપોરના 1 વાગ્યા સુધીના પાંચ કલાકના ગાળામાં ધોધમાર વરસાદ વરસ્યો હતો.
ઉંડ-1 ડેમ વિસ્તાર ઉપરાંત, ધ્રોલ તાલુકાના હમાપર, જાલીયા, માનસર, ખીજડીયા, ખેંગારકા અને મોટાઈટાળા સહિતના આસપાસના ગામોમાં પણ સાર્વત્રિક વરસાદ થયો હતો. આ ભારે વરસાદને કારણે ગ્રામ્ય વિસ્તારોના વોકળા અને નાળાઓમાં નવા પાણીની આવક જોવા મળી હતી, જે ખેતી માટે ફાયદાકારક છે અને ખેડૂતોમાં સંતોષ જોવા મળ્યો હતો.