શ્રાવણ મહિનાની શરૂઆત થતાં જ પત્તા પ્રેમીઓની જાણે કે મોસમ આવી હોય તેમ છેલ્લા ઘણા સમયથી જૂનાગઢ પોલીસ દ્વારા વાડી વિસ્તાર અને સીમ વિસ્તારમાંથી જુગારના અનેક કેસો પકડી પાડવામાં આવ્યા છે. આ ઝુંબેશ અંતર્ગત જૂનાગઢ ક્રાઇમ બ્રાન્ચે નરેડી ગામમાંથી જુગાર રમતા 8 જુગારીઓને રંગેહાથ ઝડપી પાડ્યા છે.
વંથલીના નરેડી ગામના વાડી વિસ્તારમાં ક્રાઇમ બ્રાન્ચે દરોડો પાડ્યો હતો ક્રાઇમ બ્રાન્ચના સ્ટાફને મળેલી ચોક્કસ ખાનગી બાતમીના આધારે વંથલી તાલુકાના નરેડી ગામથી બોડકા ગામ તરફ જતા રસ્તે પશ્ચિમ બાજુએ આવેલ ‘ધાર’ નામના વાડી વિસ્તારમાં દરોડો પાડવામાં આવ્યો હતો. આ વાડી હસમૂખભાઈ પરબતભાઈ સાબલપરાની કબજા-ભોગવટાની છે.
તેઓ પોતાની વાડીમાં આવેલા પતરાવાળા મકાનમાં બહારથી માણસોને બોલાવી, જુગારના સાધનો પૂરા પાડીને તીન-પત્તી રોન-પોલીસ નામનો હાર-જીતનો જુગાર રમાડતા હતા અને અંગત આર્થિક ફાયદા માટે નાલ ઉઘરાવીને જુગારનો અખાડો ચલાવતા હોવાનું સામે આવ્યું હતું.
જુગાર રમતા કુલ 8 ઇસમો રંગેહાથ ઝડપાયા પોલીસે બાતમીની ખરાઈ કરીને ઘટનાસ્થળે અચાનક દરોડો પાડતાં જુગાર રમતા કુલ 8 ઇસમો રંગેહાથ પકડાઈ ગયા હતા. આ પકડાયેલા આરોપીઓમાં નરેડી ગામના હસમૂખભાઈ પરબતભાઈ સાબલપરા, પંકજભાઈ કેશુભાઈ ડોબરીયા, હિતેશભાઈ વિઠ્ઠલભાઈ બરવાડીયા અને કિરીટભાઈ જીવાભાઈ વદરનો સમાવેશ થાય છે.
આ ઉપરાંત રવની ગામના પ્રફુલભાઈ મોહનભાઈ ભાલારા, વીરપુર ગામના યાકુબભાઈ તારમહંમદભાઈ સીડા તથા રફીકભાઈ મહંમદભાઈ સીડા અને આંબાલીયા ગામના ઈશાભાઈ અલારખાં સાંઈ પણ જુગાર રમતા ઝડપાયા હતા. આ તમામ સામે વંથલી પોલીસ સ્ટેશનમાં જુગાર ધારાની કલમ 4 અને 5 મુજબ ગુન્હો રજીસ્ટર કરીને કાયદેસરની કાર્યવાહી હાથ ધરવામાં આવી છે.