સુરતના લસકાણા પોલીસ સ્ટેશનમાં 14 વર્ષની સગીરા પર દુષ્કર્મ, ધમકી અને અશ્લીલ તસવીરો વાયરલ કરવાના ગંભીર આરોપ હેઠળ 48 વર્ષીય આરોપી સામે ગુનો નોંધાયો છે. આરોપી મામૈયા તોગાભાઈ વાટુકિયા (રહે. સહજાનંદ સોસાયટી, લંબે હનુમાન રોડ, સુરત) પીડિતાનો મોંબોલો મામો થતો હતો અને પીડિતાની માતા તેને રાખડી બાંધતી હતી. નવેમ્બર-ડિસેમ્બર 2019થી શરૂ કરીને 20 ઓગસ્ટ સુધી અલગ-અલગ સમયે આરોપીએ સગીરાનું શારીરિક શોષણ કર્યું હતું. લસકાણા પોલીસે આરોપીની ધરપકડ કરી કાયદેસરની કાર્યવાહી હાથ ધરી છે.
બ્લેકમેઇલિંગ અને વારંવાર દુષ્કર્મ આરોપી જમીન દલાલીનું કામ કરતો હતો અને પીડિતાના પરિવાર સાથે ઘરોબો કેળવી ઘરે અવારનવાર આવતો-જતો હતો. આ દરમિયાન તેણે પીડિતાની તેની મિત્ર સાથેની વ્હોટ્સએપ ચેટના સ્ક્રીનશોટ મેળવી લીધા હતા. આ ચેટ વાયરલ કરવાની ધમકી આપી તેણે પીડિતા પર દબાણ બનાવી મરજી વિરુદ્ધ શારીરિક સંબંધ બાંધ્યા હતા. આરોપીએ અંગત પળોનો વીડિયો બનાવી લીધો હતો અને તે વીડિયો વાયરલ કરવાની ધમકી આપી અલગ-અલગ જગ્યાએ પીડિતા પર વારંવાર દુષ્કર્મ આચર્યું હતું.
ફોટો વાયરલ કરી બદનામ કરવાનો પ્રયાસ આટલેથી ન અટકતાં આરોપીએ પીડિતાની અંગત તસવીરો તેમજ માંગમાં સિંદૂર ભરતા અને હાર પહેરાવતા ફોટા સમાજના ગ્રૂપમાં વાયરલ કરી દીધા હતા. વર્ષ 2023માં પીડિતાના પિતાનું અવસાન થયા બાદ આરોપી ઘરના નાના-મોટા ખર્ચ ઉઠાવતો હતો. આ અગાઉ પરિવારે તેની સાથે બે વખત સમાધાન પણ કર્યું હતું, જેમાં એક વાર રૂ. 2 લાખ અને બીજી વાર રૂ. 60 હજારમાં પતાવટ થઈ હોવાની વિગતો સામે આવી છે.