દહેજના જાગેશ્વર બજારમાંથી ૨ લાખના દારૂ સાથે ૩ની ધરપકડ કરાઈ

ભરૂચ
ભરૂચના દહેજના જાગેશ્વર ગામના મુખ્ય બજારમાંથી સ્ટેટ મોનીટરીંગ સેલે વિદેશી દારૂના મોટા જથ્થા સાથે મહિલા સહિત ત્રણ ઇસમોને ઝડપી પાડ્યા હતા. ઉલ્લેખનીય છે કે પોલીસે રૂ. ૨ લાખના દારૂના જથ્થા સહિત કુલ રૂ. ૪.૫૨ લાખથી વધુનો મુ્‌દ્દામાલ જપ્ત કર્યો હતો. સ્ટેટ મોનીટરીંગ સેલને બાતમી મળી હતી કે જાગેશ્વર ગામના છેલ્લા ફળિયામાં રહેતી મહિલા બુટલેગર મનુબેન રાયજી પટેલ બજારમાં આવેલા તેના કિરાણા સ્ટોર અને બાજુના બંધ મકાનમાં વિદેશી દારૂનો જથ્થો સંતાડી માણસો રાખી તેમની પાસે વિદેશી દારૂનું વેચાણ કરાવે છે. જેથી સ્ટેટ મોનીટરીંગ સેલે ત્યાં દરોડા પાડી સ્થળ પરથી વિદેશી દારૂની ૧૪૮૨ બોટલો કબજે કરી હતી અને રૂ. ૨ લાખનો દારૂ, વાહન તેમજ મોબાઈલ ફોન મળી કુલ રૂ. ૪.૫૨ લાખથી વધુનો મુદ્દામાલ કબજે કર્યો હતો. પોલીસે મહિલા બુટલેગર મનુબેન રાયજી પટેલ, હિતેશ દિનેશ પટેલ તેમજ વિનોદ વિશ્વનાથ ઠાકોરને ઝડપી પાડ્યો હતો. ઝડપાયેલા ઇસમોને વિદેશી દારૂ અંગે પુછપરછ કરતાં દારૂનો જથ્થો ભરૂચના કુખ્યાત બુટલેગર નયન ઉર્ફે બોબડો કિશોર કાયસ્થ પાસેથી ધર્મેશ રાયજી પટેલ લઇ આવતો હોવાનું તેમણે જણાવ્યું હતું. પોલીસે કુખ્યાત બુટલેગર સહિત ત્રણ ઇસમોને વોન્ટેડ જાહેર કરી વધુ તપાસ હાથ ધરી છે.