નવીદિલ્હી
અદાણી ઔદ્યોગિક સમૂહ સંચાલિત અદાણી પોર્ટસ એન્ડ સ્પેશ્યલ ઈકોનોમિક ઝોન લિમિટેડે ચાલુ નાણાકીય વર્ષના અંત પહેલાં ૩૦૦ મિલિયન મેટ્રિક ટન કાર્ગોનું પરિવહન કરવાનો વિક્રમ સર્જ્યો છે. માત્ર બે દાયકાના ટુંકા સમયગાળામાં અદાણી પોર્ટેઆ નવો ઇતિહાસ રચ્યો છે સાથે બજારમાં તેના હિસ્સામાં હરણફાળ ભરીને ઓલ ઈન્ડિયા કાર્ગો વોલ્યુમની વૃધ્ધિનો કિર્તીમાન રચ્યો છે. અદાણી પોર્ટ અને સેઝના મુખ્ય કારોબારી અધિકારી અને પૂર્ણકાલિન ડિરેક્ટર શ્રી કરણ અદાણીએ આ સિધ્ધિની જાહેરાત કરતા જણાવ્યું કે “અમારા કાર્ગો વોલ્યુમમાં થયેલી વૃધ્ધિ એ અમારી વ્યૂહરચના મુજબ આગળ ધપવાની અમારી કાર્યક્ષમતાનું જીવંત ઉદાહરણ છે. અદાણીએ કહ્યું હતું કે ભારતના સાગરકાંઠે અમારા પોર્ટસના નેટવર્કની સાથે સાથે અમારી સુસંકલિત લોજીસ્ટીક્સ ક્ષમતાઓ તથા ટેકનોલોજીનો ઉપયોગ કરીને ડીઝીટલાઇઝડ સંચાલન મારફતે અમે અમારા ગ્રાહકો તથા વૈશ્વિક શિપિંગ લાઇન્સ સહિતના ભાગીદારો સાથે નિર્માણ કરેલા ઘનિષ્ઠ સંબંધો સાથે તમામ પરિબળોને કારણે અમે અદાણી પોર્ટસ અને સેઝને સુસંકલિત પોર્ટસ અને લોજીસ્ટીક્સ પ્લેટફોર્મ બનાવ્યું છે. તદુપરાંત ભારતીય અર્થતંત્રમાં થઈ રહેલા વિકાસને કારણે અમારી આ વૃધ્ધિ જળવાઈ રહેશે તેવી અમને અપેક્ષા છે.” “આ સિધ્ધિ કંપનીના વૈશ્વિક બજાર અને જીઓપોલિટીકલ ઉતાર-ચઢાવ તથા ઝડપથી બદલાતા જતા પરિવર્તનોને અનુસરવાની તાકાતના પ્રદર્શન સાથે સાતત્યપૂર્ણ વૃધ્ધિ તરફની મજલ ચાલુ રાખવાની ક્ષમતા દર્શાવે છે.આ સિધ્ધિ માટે તેમણે સમગ્ર કાર્યશીલ સમર્પિત ટીમને અભિનંદન પાઠવતા ઉમેર્યુ કે તેઓના કર્મઠ અભિગમે વૃધ્ધિને વેગ આપીને આ સિધ્ધિ શક્ય બનાવી છે. તેમણે વર્ષ ૨૦૨૫ સુધીમાં ૫૦૦ મિલિયન મે.ટન વોલ્યુમ સુધી પહોંચવાના ધ્યેયને હાંસલ કરવાનો અને વર્ષ ૨૦૩૦ સુધીમાં વિશ્વની સૌથી મોટી ખાનગી પોર્ટ કંપની બનીશુ એવો ભરપૂર આત્મ વિશ્વાસ વ્યક્ત કર્યો હતો. અદાણી પોર્ટસ કાર્ગો વોલ્યુમ વધારવા સાથે તેના પોર્ટફોલિયોમાં સમાવિષ્ટ પાંચ પોર્ટ સાથે વાર્ષિક ૧૦૦ મિલિયન મે.ટન સુધી પહોંચતા ૧૪ વર્ષ લાગ્યા હતા. અદાણી પોર્ટસની આ ક્ષમતાને બમણી એટલે કે વાર્ષિક ૨૦૦ મિલિયન મે.ટન ક્ષમતા એ પછીના ફકત ૩ વર્ષમાં નોંધાઈ હતી. કંપનીના પોર્ટફોલિયોમાં ૧૨ પોર્ટસ છે ત્યારે અદાણી પોર્ટસ એન્ડ સ્પેશ્યલ ઈકોનોમિક ઝોન ૩૦૦ મિલિયન મે.ટન કાર્ગો વોલ્યુમ સુધી પહોંચવાનું ધ્યેય માત્ર ૩ વર્ષમાં જ હાંસલ કર્યું છે. નોંધપાત્ર બાબત એ છે કે ૨૦૦ મિલિયન મે.ટનથી ૩૦૦ મિલિયન મે.ટન સુધી પહોંચવાના સમયગાળામાં કોરોના મહામારીને કારણે વિશ્વમાં આર્થિક મંદીના બે વર્ષનો પણ સમાવેશ થાય છે. બિઝનેસની કામગીરીમાં વૃધ્ધિ કરવાની સાથે સાથે અદાણી પોર્ટસ એન્ડ સ્પેશ્યલ ઈકોનોમિક ઝોન તેની પર્યાવરણલક્ષી કટિબધ્ધતાઓ પણ પાર પાડી રહી છે. એમિશનની તિવ્રતા ઘટાડવાની પ્રક્રિયા ૨૦૧૬ના સ્તરથી ૩૦ ટકા સુધી પહોંચાડવામાં આવી છે. રબર ટાયર્ડ ગેન્ટ્રી ક્રેઈન્સના વિજળીકરણની કામગીરી પૂર્ણ કરવામાં આવી છે અને ક્વે ક્રેન્સ અને મોબાઈલ હાર્બર ક્રેન્સના વિજળીકરણની કામગીરી પ્રગતિમાં છે અને તેને વર્ષ ૨૦૨૩ સુધીમાં પૂર્ણ કરવાનું લક્ષ્ય રખાયું છે. ડિઝલ આધારિત ઈન્ટર્નલ ટ્રાન્સફર વ્હિકલ્સ ને બદલે ઈલેક્ટ્રિક ઈન્ટર્નલ ટ્રાન્સફર વ્હિકલ્સ મૂકવામાં આવ્યા છે. ૧૦૦ ઈલેક્ટ્રિક ઈન્ટર્નલ ટ્રાન્સફર વ્હિકલ્સની પ્રથમ બેચ વર્ષ ૨૦૨૨ના મધ્ય સુધીમાં આવી જાય તેવી સંભાવના છે અને વર્ષ ૨૦૨૩ સુધીમાં તમામ ક્રેનનું વિજળીકરણ થવાની અપેક્ષા છે. વધુ એક ગ્રીન પોર્ટ તરીકેની પહેલ તરીકે અમે પોર્ટની બાકી રકમ, પાયલોટેડ અને બર્થ હાયર ચાર્જીસમાં બળતણ તરીકે એલએનજીનો ઉપયોગ કરતા જહાજાેને આપેલા ૫૦ ટકા ડિસ્કાઉન્ટનો સમાવેશ થાય છે. વનીકરણ વધારવાના પગલાંની સાથે સાથે અન્ય વધુ ગ્રીન પગલાં અમલીકરણ હેઠળ છે. અદાણી પોર્ટસ એન્ડ સ્પેશ્યલ ઈકોનોમિક ઝોન વર્ષ ૨૦૨૫ સુધીમાં કાર્બન ન્યૂટ્રાલિટી હાંસલ કરવાનું ધ્યેય ધરાવે છે. વૈશ્વિક સ્તરે વિવિધિકરણ ધરાવતા અદાણી ગ્રુપના હિસ્સારૂપ અદાણી પોર્ટસ એન્ડ સ્પેશ્યલ ઈકોનોમિક ઝોન લિમિટેડ પોર્ટ કંપનીમાંથી પોર્ટસ એન્ડ લોજીસ્ટીક્સ પ્લેટફોર્મ તરીકે ઉભરી આવી છે અને તેના પોર્ટ ગેટથી માંડીને કસ્ટમરના ગેટ સુધી એન્ડ-ટુ એન્ડ સોલ્યુશન્સ પૂરાં પાડી રહી છે. વ્યૂહાત્મક સ્થળોએ આવેલાં ગુજરાતમાં મુંદ્રા, દહેજ, તુના અને હજીરા, ઓડીશામાં ધામરા, ગોવામાં માર્મુગોવા, આંધ્ર પ્રદેશમાં ગંગાવરમ, વિશાખાપટ્નમ અને ક્રિશ્નાપટનમ, મહારાષ્ટ્રમાં દીઘી અને ચેન્નાઈમાં એનરોન સહિત ૧૨ પોર્ટસ અને ટર્મિનલ્સ સાથે તે સૌથી મોટી પોર્ટ ડેવલપર અને ઓપરેટર છે, જે દેશની કુલ પોર્ટ ક્ષમતામાંથી ૨૪ ટકાનું પ્રતિનિધિત્વ કરે છે. આ પોર્ટ સાગરકાંઠાના વિસ્તારો અને હિન્ટરલેન્ડમાં વ્યાપક જથ્થો હેન્ડલ કરે છે. કંપની કેરાલામાં વિઝીન્ઝામ ખાતે ટ્રાન્સશીપમેન્ટ પોર્ટ વિકસાવી રહી છે.
