ગુજરાતમાં મેઘરાજાએ રમઝટ બોલાવી છે. આજે (પહેલી જુલાઈ) પણ રાજ્યના મોટાભાગના વિસ્તારોમાં વરસાદી માહોલ છવાયો છે. ત્યારે સૌરાષ્ટ્રમાં છેલ્લા ૨૪ કલાકમાં દેવભૂમિ દ્વારકા, પોરબંદર, જૂનાગઢ, ગીર સોમનાથ અને જામનગર જિલ્લામાં એકથી ૧૧ ઈંચ જેટલો ભારે વરસાદ વરસી ગયો હતો. જેમા સૌથી વધુ દેવભૂમિ દ્વારકાના ખંભાળિયામાં છેલ્લા ૪ કલાકમં ૫.૨૫ ઈચ જેટલો વરસાદ નોંધાયો છે.જેના કારણે રસ્તોઓ ધસમસતી નદી બની ગઇ હોય તેવા દ્રશ્યો જોવા મળ્યા હતા.
દેવભૂમિ દ્વારકા જિલ્લામાં સોમવારે સવારે ૬થી ૧૦ વાગ્યા સુધીમાં ખંભાળિયા તાલુકામાં ૧૩૧ મિ.મી., કલ્યાણપુરમાં ૫૭ મિ.મી., દ્વારકામાં ૩૫ મિ.મી. અને ભાણવડમાં ૨૦ મિ.મી. વરસાદ સાથે સીઝનનો કુલ વરસાદ ખંભાળિયામાં ૨૪ ઈંચ (૫૮૮ મિ.મી.), દ્વારકામાં ૧૦ ઈંચ (૨૪૭ મિ.મી.), કલ્યાણપુરમાં સવા ૭ ઈંચ (૧૧૯ મિ.મી.) અને ભાણવડમાં ૬ ઈંચ (૧૪૭ મિ.મી.) વરસી જવા પામ્યો છે.
હવામાન વિબાગની આગાહી અનુસાર, આજે કચ્છ, દેવભૂમિ દ્વારકા, જામનગર, પોરબંદર, જૂનાગઢ, સુરત, નવસારી અને વલસાડમાં અત્યંત ભારે વરસાદની શક્યતા. તો પાટણ, મોરબી, બનાસકાંઠા, રાજકોટ, અમરેલી, ભાવનગર, ગીર સોમનાથ, વડોદરા, ભરૂચ, નર્મદા, પંચમહાલ, દાહોદ, છોટા ઉદેપુર, તાપી અને ડાંગમાં અતિભારે વરસાદની શક્યતા. બીજી તરફ સુરેન્દ્રનગર, બોટાદ, અમદાવાદ, ગાંધીનગર, આણંદ, ખેડા, અરવલ્લી, મહિસાગર, સાબરકાંઠા અને મહેસાણામાં ભારે વરસાદની શક્યતા છે.