જામનગર શહેરની સીટી ‘સી’ ડિવિઝન પોલીસે ‘તેરા તુજકો અર્પણ’ કાર્યક્રમ હેઠળ રૂ. 4,11,071ની કિંમતના 22 ગુમ મોબાઈલ ફોન શોધી કાઢ્યા છે. આ મોબાઈલ તેમના મૂળ માલિકોને પરત સોંપવામાં આવ્યા.
પોલીસની સર્વેલન્સ સ્ક્વોડે CEIR પોર્ટલ અને ટેકનિકલ મદદથી આ મોબાઈલ શોધી કાઢ્યા. રાજકોટ રેન્જના DIG નિર્લિપ્ત રાય અને જામનગર જિલ્લા પોલીસ અધિક્ષક ડૉ. રવિ મોહન સૈનીના માર્ગદર્શન હેઠળ આ કામગીરી થઈ.
સીટી ‘સી’ ડિવિઝનના પોલીસ ઇન્સ્પેક્ટર એચ.વી. રાઠોડ અને પીએસઆઈ આર.એલ. કંડૌરીયાના નેતૃત્વમાં પ્રયાસો કરાયા. પોલીસ કોન્સ્ટેબલ કૃષ્ણપાલસિંહ જાડેજાએ છેલ્લા બે મહિનામાં આ મોબાઈલ શોધ્યા.
શોધાયેલા મોબાઈલમાં વનપ્લસ, વિવો, ઓપો, રિયલમી, સેમસંગ જેવી કંપનીઓના સ્માર્ટફોન છે. આ ફોન જામનગર શહેર, ગ્રામ્ય અને આસપાસના જિલ્લાઓમાંથી મળ્યા હતા. લાંબા સમયથી ગુમ થયેલા ફોન પરત મળતા નાગરિકોએ ખુશી વ્યક્ત કરી.