જામનગર મહાનગરપાલિકાની ફૂડ શાખાએ ગ્રેઇન માર્કેટમાં ખાંડ બજાર પાછળ આવેલા ગોડાઉનમાંથી 324 કિલો શંકાસ્પદ ઘી સીઝ કર્યું. ઘી અને અન્ય સામગ્રીની કુલ કિંમતની વિગતો મુજબ, ઘીનો જથ્થો રૂ. 1,13,400નો હતો.
ફૂડ શાખાની ટીમે ‘કાશ ટ્રેડર્સ’ના ગોડાઉનમાં તપાસ કરી હતી. તેના સંચાલક મહમૂદહુશેન અબ્દુલરઝાક કાશ છે. તપાસ દરમિયાન ઘીમાં ભેળસેળ થતી હોવાનું સામે આવ્યું હતું. ટીમે ઘીના નમૂના લીધા અને બાકીનો જથ્થો ગોડાઉનમાં સીઝ કર્યો.
ગોડાઉનમાંથી ‘પ્રોટો’ વનસ્પતિ ઓઈલના 16 ખાલી અને 4 ભરેલા ડબ્બા મળ્યા. ‘સુમન ગોલ્ડ’ રિફાઇન્ડ પામ ઓઈલના 2 ખાલી અને 3.5 ભરેલા ડબ્બા પણ મળ્યા. ઘી જેવી સુગંધ અને રંગ આપવા માટેનું 5 લીટર કલર-ફ્લેવર પણ મળ્યું.
બીજી ટીમે ગોકુલનગર વિસ્તારમાં મીઠાઈ અને ફરસાણની દુકાનોમાં તપાસ કરી. તળવા માટે વપરાતા તેલની TPC (ટોટલ પોલર કમ્પાઉન્ડ્સ) મશીનથી ચકાસણી કરવામાં આવી. ગુણવત્તા તપાસ માટે અલગ-અલગ દુકાનોમાંથી મીઠાઈ અને ફરસાણના 8 શંકાસ્પદ નમૂના લેવામાં આવ્યા. વધુ તપાસ માટે આ નમૂના લેબોરેટરીમાં મોકલાયા છે.