જામનગર તાલુકાના નવા મોખાણા ગામની સીમમાં ગઈકાલે મોડી રાત્રે દીપડો જોવા મળ્યો હતો. આ ઘટનાને પગલે સ્થાનિક ગ્રામજનોમાં ભય અને ચિંતા વ્યાપી ગઈ છે.
રાત્રિના આશરે 12:45 વાગ્યે વાડી વિસ્તારમાં દીપડો બેઠેલો જોવા મળ્યો હતો. પ્રત્યક્ષદર્શીઓએ તાત્કાલિક સાવચેતીના પગલાં લીધા હતા. એક સ્થાનિકે પોતાના મોબાઈલ ફોનમાં દીપડાનો વીડિયો પણ બનાવ્યો હતો, જેના કારણે આસપાસના વિસ્તારમાં દીપડાની હાજરીની પુષ્ટિ થઈ હતી અને લોકોમાં ચિંતા વધી હતી.
આ ઘટનાની જાણ સ્થાનિક આગેવાનો અને ગ્રામજનો દ્વારા વન વિભાગને કરવામાં આવી હતી. માહિતી મળતા જ વન વિભાગની ટીમ તાત્કાલિક સ્થળ પર પહોંચી હતી અને દીપડાની હાજરી અંગે તપાસ શરૂ કરી હતી. વન વિભાગ દ્વારા આસપાસના વિસ્તારમાં સઘન શોધખોળ હાથ ધરવામાં આવી રહી છે.
ઘટનાની ગંભીરતાને ધ્યાનમાં રાખીને પંચકોશી ‘એ’ ડિવિઝન પોલીસ સ્ટેશનની ટીમ પણ સ્થળ પર પહોંચી હતી. પોલીસ અને વન વિભાગ દ્વારા સંયુક્ત રીતે સ્થાનિક નાગરિકોને સતર્ક રહેવા, રાત્રિના સમયે એકલા બહાર ન નીકળવા તેમજ પોતાના પશુધન અને ઢોરઢાંખરને સુરક્ષિત સ્થળે રાખવા સૂચનાઓ આપવામાં આવી છે.