અમદાવાદ ગ્રામ્ય આરોગ્ય વિભાગ દ્વારા 31 મેના રોજ વિશ્વ તમાકુ નિષેધ દિવસ નિમિત્તે જનજાગૃતિ કાર્યક્રમોનું આયોજન કરવામાં આવ્યું હતું. આ કાર્યક્રમોનો મુખ્ય ઉદ્દેશ્ય તમાકુના સેવનથી થતા ગંભીર આરોગ્ય અને સામાજિક નુકસાન અંગે લોકોને જાગૃત કરવાનો હતો. વિશ્વ આરોગ્ય સંસ્થા (WHO)ના અંદાજ મુજબ, દર વર્ષે વિશ્વભરમાં 80 લાખથી વધુ લોકો તમાકુના કારણે મૃત્યુ પામે છે. ભારતમાં પણ તમાકુજન્ય રોગોને કારણે વાર્ષિક આશરે 13 લાખ લોકો જીવ ગુમાવે છે, જે એક ગંભીર ચિંતાનો વિષય છે.
આ વર્ષના વિશ્વ તમાકુ નિષેધ દિવસની થીમ “Unmasking the Appeal – Countering Nicotine and Tobacco Addiction” રાખવામાં આવી હતી. આ થીમ હેઠળ જાગૃતિ લાવવા માટે રેલીઓ, જૂથ ચર્ચાઓ, પ્રતિજ્ઞા અભિયાન અને વ્યાપક જનસંપર્ક પ્રવૃત્તિઓ હાથ ધરવામાં આવી હતી. તમાકુના સેવનથી કેન્સર, હૃદયરોગ, સ્ટ્રોક અને ફેફસાંના ગંભીર રોગોનું જોખમ નોંધપાત્ર રીતે વધે છે. આ ઉપરાંત, COTPA અધિનિયમ હેઠળ જિલ્લામાં ₹25,000 કરતાં વધુનો દંડ પણ વસૂલ કરવામાં આવ્યો છે, જે કાયદાના પાલન પર ભાર મૂકે છે.