રાજકોટ શહેરમાં લાંબા વિરામ બાદ ગત મોડી રાતથી ધીમીધારે મેઘમહેર શરૂ થઈ છે, જેમાં કાલાવડ રોડ, રેસકોર્સ તથા યુનિવર્સિટી રોડ સહિતના વિસ્તારોમાં રોડ ભીના થવાની સાથે વાતાવરણમાં ઠંડક પ્રસરી ગઈ છે.
છેલ્લા એક મહિનાથી મેઘરાજા ખેંચાતા આજી, ન્યારી અને ભાદર જેવા મુખ્ય ડેમો ખાલી ખમ રહ્યા છે અને શહેરી તથા ગ્રામ્ય વિસ્તારમાં પાણી તેમજ ઘાસચારાની ગંભીર અછત ઊભી થવાનું જોખમ તોળાઈ રહ્યું છે, જો કે આ હળવા ઝાપટાંથી કપાસ, મગફળી અને સોયાબીન જેવા ખરીફ પાકોને નવું જીવતદાન મળવાની આશાથી ખેડૂતોમાં રાહત વ્યાપી છે.
રાજકોટમાં લાંબી ખેંચ બાદ અંતે વાતાવરણમાં પલટો આવ્યો છે. બંગાળની ખાડીમાં સર્જાયેલી નવી લો પ્રેશર સિસ્ટમના કારણે આ ક્ષેત્રમાં વરસાદી માહોલ આકાર લઈ રહ્યો છે. ગત મોડી રાત્રિથી રાજકોટ શહેર તેમજ આસપાસના વિસ્તારોમાં ધીમીધારે વરસાદ શરૂ થતાં લાંબા સમયથી ઉકળાટ અને બફારાથી અકળાયેલા લોકોને મોટી રાહત મળી છે.
શહેરના કાલાવડ રોડ, રેસકોર્સ રિંગરોડ, યુનિવર્સિટી રોડ અને નાનામૌવા રોડ સહિતના મુખ્ય માર્ગો ભીના થયા છે. વરસાદી છાંટા અને ધીમીધારના આગમન સાથે જ સમગ્ર વાતાવરણમાં ઠંડક પ્રસરી ગઈ છે. હવામાન વિભાગ દ્વારા વ્યક્ત કરવામાં આવેલી આગાહી મુજબ, આગામી 48 કલાક દરમિયાન રાજકોટ અને સૌરાષ્ટ્રના વિવિધ ભાગોમાં હળવાથી મધ્યમ વરસાદની પૂરેપૂરી શક્યતા છે.