ગોધરામાં TET મુક્તિની માંગ સાથે શિક્ષકો દ્વારા વિરોધ પ્રદર્શન કરવામાં આવ્યું. બામરોલી રોડ પર આવેલી સાંદિપની સ્કૂલ સંકુલ ખાતે અખિલ ભારતીય રાષ્ટ્રીય શૈક્ષણિક મહાસંઘ, ગુજરાત દ્વારા આ ધરણા કાર્યક્રમનું આયોજન કરાયું હતું. આ વિરોધ પ્રદર્શનમાં પંચમહાલ અને આસપાસના વિસ્તારોમાંથી ૨ હજારથી વધુ શિક્ષકો એકત્રિત થયા હતા. તેમણે સરકાર સમક્ષ TET માંથી મુક્તિ આપવાની માંગ કરી હતી.
ધરણા પર બેઠેલા શિક્ષકોએ હાથમાં પ્લે-કાર્ડ્સ અને બેનરો લહેરાવીને સૂત્રોચ્ચાર કર્યા હતા. તેમની મુખ્ય માંગ TET માંથી મુક્તિ આપવાની હતી. શૈક્ષણિક મહાસંઘના હોદ્દેદારોએ જણાવ્યું હતું કે શિક્ષકોના હિતમાં આ માંગણી સ્વીકારવામાં આવે તે જરૂરી છે. તેમણે ચીમકી ઉચ્ચારી હતી કે જો આગામી સમયમાં યોગ્ય નિર્ણય નહીં લેવાય તો આ આંદોલન વધુ ઉગ્ર બનાવવામાં આવશે.