ગીર વિસ્તારમાં વાતાવરણમાં અચાનક પલટો આવ્યો છે, જેના કારણે તુલસીશ્યામ સહિત ગીર ગઢડા તાલુકાના મધ્ય ગીર જંગલ વિસ્તારમાં છૂટોછવાયો કમોસમી વરસાદ વરસ્યો છે. આ અચાનક બદલાયેલા માહોલને કારણે ખેડૂતોમાં ચિંતાનો માહોલ જોવા મળી રહ્યો છે. ખાસ કરીને કેરીના પાકને નુકસાન થવાની ભીતિ સેવાઈ રહી છે.
હાલમાં કેરીનો પાક તૈયાર થવાની નજીક છે, ત્યારે આ કમોસમી વરસાદ બાગાયતી ખેતી કરતા ખેડૂતો માટે મુશ્કેલીભરી પરિસ્થિતિ ઊભી કરી શકે છે. પ્રખ્યાત કેસર કેરીના ઉત્પાદન પર આ વરસાદની સીધી અસર થવાની શક્યતા વ્યક્ત કરવામાં આવી રહી છે.
વરસાદના કારણે ખેડૂતો પોતાના તૈયાર પાકને બચાવવા માટે તાત્કાલિક પગલાં લઈ રહ્યા છે અને બાગમાં દોડધામ મચી છે. જો વરસાદ ચાલુ રહેશે તો પાકને ભારે નુકસાન પહોંચી શકે છે, જેનાથી ખેડૂતોને મોટું આર્થિક નુકસાન વેઠવું પડી શકે છે.