પાટણ જિલ્લાના ચાણસ્મામાં અગાઉના પ્રેમ સંબંધની અદાવત રાખી ત્રણ શખ્સોએ એક જ પરિવારના સભ્યો પર લાકડી અને છરી વડે હુમલો કરી જાનથી મારી નાખવાની ધમકી આપી હોવાની ઘટના પ્રકાશમાં આવી છે. આ મામલે ચાણસ્મા પોલીસ મથકે ત્રણ શખ્સો વિરુદ્ધ ગુનો નોંધાયો છે. ચાણસ્માના ઇન્દિરાનગરમાં રહેતા બળદેવભાઈ જેણાભાઈ પરમારે નોંધાવેલી ફરિયાદ મુજબ, તેમની દીકરી સાથે આરોપી વિશાલ ઉર્ફે ભાણો સબુરભાઈ પરમારને અગાઉ પ્રેમ સંબંધ હતો.
આ બાબતે સામાજિક રીતે સમાધાન થયું હતું અને વિશાલને ચાણસ્મામાં નહીં આવવા માટે સામાજિક આગેવાનો દ્વારા પ્રતિબંધ મુકવામાં આવ્યો હતો. આમ છતાં, ગત તારીખ 10/05/2026ના રોજ રાત્રિના 21:00 કલાકે વિશાલ તેના મામા કિરીટકુમાર કાંતિલાલ પરમારના ઘરે આવ્યો હતો. આ અંગે ફરિયાદી બળદેવભાઈ ઠપકો આપવા જતા આરોપી કિરીટ ઉશ્કેરાઈ ગયા હતા અને તેમણે ફરિયાદીને બરડાના ભાગે લાકડી ફટકારી હતી.
વધુમાં, ઝઘડો ઉગ્ર બનતા આરોપી વિશાલ અને પિયુષકુમાર કિરીટ પરમાર હાથમાં છરીઓ લઈને ધસી આવ્યા હતા. આરોપી પિયુષકુમારે છરી વડે હુમલો કરતા બળદેવને જમણા હાથના અંગૂઠા પર ઈજા પહોંચી હતી. આ દરમિયાન ફરિયાદીના ભાઈ પ્રવીણ અને પુત્રી નિરંજલીબેન તથા વૃદ્ધ માતા લક્ષ્મીબેન વચ્ચે છોડાવવા પડતા આરોપીઓએ તેમને પણ ગડદાપાટુનો માર માર્યો હતો. આરોપીઓએ છરી વડે પ્રવીણભાઈને ડાબા હાથની કોણી નીચે ઈજા પહોંચાડી હતી અને લક્ષ્મીબેનને આંખના ભાગે લાકડી મારી ઈજા પહોંચાડી હતી. આરોપીઓએ જતાં-જતાં જાનથી મારી નાખવાની ધમકી પણ આપી હતી.