જામનગર જિલ્લા પંચાયતમાં આગામી કાર્યકાળ માટે હોદ્દેદારોની વરણી પ્રક્રિયા પૂર્ણ થઈ ગઈ છે. ભારતીય જનતા પાર્ટી દ્વારા સામાન્ય અને બક્ષીપંચ (OBC) જ્ઞાતિના સમીકરણોને ધ્યાનમાં રાખીને નવા હોદ્દેદારોના નામોની સત્તાવાર જાહેરાત કરવામાં આવી છે. આ વરણી પક્ષના વરિષ્ઠ આગેવાનો અને સભ્યોની હાજરીમાં કરવામાં આવી હતી.
નવી ટીમમાં પ્રમુખ તરીકે રંજનબેન દયાળજીભાઈ જીવાણી (ખારવા બેઠક), ઉપપ્રમુખ તરીકે પરેશભાઈ ઘેલાભાઈ હિરપરા (શેઠવડાળા બેઠક), કારોબારી ચેરમેન તરીકે સુનિલભાઈ રાઠોડ (ધુવાવ બેઠક) અને શાસક પક્ષના નેતા તરીકે પ્રદ્યુમનસિંહ ઝાલા (સિંગચ બેઠક)ની વરણી કરવામાં આવી છે.
આ વખતે જામનગર જિલ્લા પંચાયતમાં પ્રમુખ પદ સામાન્ય મહિલા માટે અનામત રાખવામાં આવ્યું હતું. ખારવા જિલ્લા પંચાયત બેઠક પરથી વિજેતા બનેલા મહિલા સદસ્ય રંજનબેન દયાળજીભાઈ જીવાણીને પ્રમુખ જાહેર કરાયા છે. તેમના ટેકેદાર તરીકે મહેન્દ્રસિંહ જાડેજા રહ્યા હતા.
શેઠવડાળા બેઠક પરથી ચૂંટાયેલા પરેશભાઈ હિરપરાને જિલ્લા પંચાયતના ઉપપ્રમુખ તરીકે નિયુક્ત કરાયા છે, જેમની ઉમેદવારીના ટેકેદાર રાજુભાઈ મકવાણા હતા. ધુવાવ જિલ્લા પંચાયતની બક્ષીપંચ અનામત બેઠક પરથી ચૂંટાયેલા સુનિલભાઈ રાઠોડને મહત્વના ગણાતા કારોબારી ચેરમેન પદની જવાબદારી સોંપાઈ છે. જ્યારે સિંગચ બેઠકના વિજેતા સદસ્ય પ્રદ્યુમનસિંહ ઝાલાને જિલ્લા પંચાયતમાં શાસક પક્ષના નેતા બનાવવામાં આવ્યા છે.
આ જાહેરાત સમયે જામનગર જિલ્લાના પ્રભારી દિલીપભાઈ બારડ, જામનગર ભાજપ જિલ્લા પ્રમુખ વિનોદભાઈ ભંડેરી, માર્કેટિંગ યાર્ડના ચેરમેન મુકુંદભાઈ સભાયા, જિલ્લા પંચાયતના સદસ્ય મહેન્દ્રસિંહ જાડેજા, મહામંત્રી કુમારપાલસિંહ, ભરતભાઈ, ભોવનભાઈ તેમજ જિલ્લા પંચાયતના તમામ ચૂંટાયેલા સભ્યો અને સ્થાનિક આગેવાનો મોટી સંખ્યામાં ઉપસ્થિત રહ્યા હતા. તેમણે નવા હોદ્દેદારોને શુભેચ્છા પાઠવી હતી.
ભારતીય જનતા પાર્ટીએ આ હોદ્દાઓની વરણીમાં સામાન્ય અને પછાત વર્ગ વચ્ચે સમતોલન જાળવી રાખવાનો પ્રયાસ કર્યો છે, જેને સંગઠન અને ચૂંટાયેલા સભ્યોએ આવકાર્યો છે.