કચ્છ જિલ્લામાં મિલકત સંબંધી ગુનાઓને ઉકેલવાની દિશામાં નખત્રાણા પોલીસે મહત્વપૂર્ણ કામગીરી કરી નાગલપર ગામે થયેલી ઘરફોડ ચોરીનો ભેદ ઉકેલ્યો છે. આ ગુનામાં સંડોવણીના આધારે રમેશ ચમનલાલ રાઠોડ (ઉંમર 32 વર્ષ), રહે. નાગલપર, તા. નખત્રાણા અને નિહાલ દિનેશભાઈ સોની (ઉંમર 31 વર્ષ), રહે. મણિનગર, નખત્રાણાને ઝડપી પાડવામાં આવ્યા છે. પોલીસ દ્વારા બંને પાસેથી સોના-ચાંદીના દાગીના સહિત કુલ રૂ. 14,35,122ની કિંમતનો મુદ્દામાલ કબજે કરવામાં આવ્યો છે.
નખત્રાણા પોલીસ સ્ટેશનમાં ભારતીય ન્યાય સંહિતા, 2023ની કલમ 305(એ), 331(1), 331(3) અને 54 હેઠળ નોંધાયેલા ગુનાની તપાસ દરમિયાન પોલીસને આ સફળતા મળી છે. ઘરફોડ ચોરીના આ બનાવમાં ચોરાયેલા મુદ્દામાલની શોધખોળ હાથ ધરવામાં આવી હતી, જેના પરિણામે લાખો રૂપિયાની કિંમતની વસ્તુઓ રિકવર કરવામાં આવી છે.
પોલીસે કબજે કરેલા મુદ્દામાલમાં 79.57 ગ્રામ વજનની સોનાની ઢાળનો સમાવેશ થાય છે, જેની કિંમત રૂ. 10,25,325 આંકવામાં આવી છે. આ ઉપરાંત 358 ગ્રામ વજનના નાના-મોટા ચાંદીના દાગીના, જેની કિંમત રૂ. 67,127 થાય છે, તે પણ કબજે કરવામાં આવ્યા છે. ચોરીના કેસમાં અન્ય ઉપયોગી પુરાવા અને વાહનો પણ પોલીસને મળ્યાં છે.