મહારાષ્ટ્ર
મહારાષ્ટ્રની ઉદ્ધવ સરકાર પર સંકટના વાદળો ઘેરાઈ રહ્યા છે. શિવસેનાના નેતા અને સરકારમાં શહેરી વિકાસ મંત્રી એકનાથ શિંદેએ બળવાખોર વલણ અપનાવ્યું છે. પાર્ટીના ૧૧ ધારાસભ્યો સાથે શિંદે હાઈકમાન્ડની પહોંચની બહાર છે. આવી સ્થિતિમાં ફરી એકવાર રાજ્યમાં રાજકીય હલચલ તેજ થઈ ગઈ છે. કહેવામાં આવી રહ્યું છે કે મંત્રી એકનાથ શિંદે ધારાસભ્યો સાથે સુરત પહોંચી ગયા છે. એવું પણ કહેવામાં આવી રહ્યું છે કે તેઓ બપોરે પ્રેસ કોન્ફરન્સ પણ કરશે. દરમિયાન કેન્દ્રીય મંત્રી નારાયણ રાણેએ ટ્વીટ કરીને શિંદેના પગલાની પ્રશંસા કરી છે. કેન્દ્રીય મંત્રી નારાયણ રાણેએ પોતાના ટ્વીટમાં કહ્યું, “શાબાશ એકનાથજી, યોગ્ય સમયે યોગ્ય ર્નિણય લેવા બદલ, નહીંતર તમારી ખુશી જલ્દી સમાપ્ત થઈ જશે.” અહીં ભાજપના નેતા પ્રવીણ દરેકરે કહ્યું કે જાે જરૂર પડશે તો ભાજપ સરકાર બનાવવાનો દાવો રજૂ કરશે. દરેકરે કહ્યું, “મહારાષ્ટ્રના લોકો માટે જે યોગ્ય છે તે કરવામાં આવશે. સત્તા કરતાં તેમનું હિત વધુ મહત્વનું છે. જાે રાજ્યના હિત માટે જરૂર પડશે, તો ભાજપ ટૂંક સમયમાં મહારાષ્ટ્રમાં સરકાર બનાવવાનો દાવો કરશે.” બીજી તરફ મહારાષ્ટ્ર બીજેપીના પ્રદેશ અધ્યક્ષ ચંદ્રકાંત દાદા પાટીલે કહ્યું કે અમે આ સમગ્ર ઘટનામાં રાજકીય ઘટનાક્રમ પર ચાંપતી નજર રાખી રહ્યા છીએ. આનાથી કંઈપણ બદલાશે એવું કહેવું થોડું વહેલું ગણાશે. સંજય રાઉતના ઉશ્કેરણીજનક ભાષણોને કારણે તેમની પાર્ટીમાં મુશ્કેલી ઉભી થઈ છે. એકનાથ શિંદેનો બળવો એ લોકો સહન નહીં કરે તેનું ઉદાહરણ છે. શિવસેનાના નેતા સંજય રાઉતે કહ્યું કે શિવસેનાના કેટલાક ધારાસભ્યો અને એકનાથ શિંદેનો હાલ સંપર્ક નથી થઈ રહ્યો. મહાવિકાસ આઘાડી સરકારને તોડી પાડવાના પ્રયાસો થઈ રહ્યા છે, પરંતુ ભાજપે યાદ રાખવું પડશે કે મહારાષ્ટ્ર રાજસ્થાન કે મધ્યપ્રદેશથી ઘણું અલગ છે. તેમણે વધુમાં કહ્યું કે મેં સાંભળ્યું છે કે અમારા ધારાસભ્યો ગુજરાતના સુરતમાં છે અને તેમને જવા દેવાયા નથી, પરંતુ તેઓ ચોક્કસપણે પાછા આવશે કારણ કે તેઓ બધા શિવસેનાને સમર્પિત છે. મને ખાતરી છે કે અમારા તમામ ધારાસભ્યો પાછા ફરશે અને બધું સારું થઈ જશે.
