રાજ્યના ૧૩ જિલ્લાઓમાં ખાલી પડેલ તાલુકા પંચાયતની ૧૭ અને નગરપાલિકાની ૨૯ બેઠકો માટે પેટા ચૂંટણીઓ મોકૂફ
રાજ્ય ચૂંટણી આયોગ દ્વારા રાજ્યની ૧૩ જિલ્લાની ખાલી પડેલ ૧૩ તાલુકા પંચાયતોની ૧૭ બેઠકો અને ૧૩ નગરપાલિકાઓની ખાલી પડેલ ૨૯ બેઠકોની પેટા ચૂંટણી માટે આગામી તા.૨૨ માર્ચના રોજ યોજનાર મતદાન તથા તા.૨૪ માર્ચના રોજ યોજાનાર મતગણતરી મોકૂફ રાખવામાં આવી છે.
તાજેતરમાં ફેલાયેલ નોવેલ કોરોના વાયરસને વિશ્વ આરોગ્ય સંસ્થાએ મહામારી જાહેર કરેલ છે. મહામારીની આપત્તિની સંભવિત ગંભીરતાને ધ્યાને લઈ રાજ્ય ચૂંટણી આયોગ દ્વારા મતદાન સહિત પેટા ચૂંટણી કાર્યક્રમ મુજબની હવે પછીની તમામ ચૂંટણી પ્રક્રિયા મોકૂફ રાખવા આદેશ કરવામાં આવ્યો છે. મુક્ત મતદાન માટે પરિસ્થિતિ સામાન્ય થતાં મોકૂફ રાખેલ પેટા ચૂંટણી પ્રક્રિયા હવે પછીથી નક્કી થાય તે કાર્યક્રમ મુજબ હાથ ધરવામાં આવશે