નવીદિલ્હી
પાકિસ્તાને ઈંગ્લેન્ડ પ્રવાસને બાદ કરતા તમામ વન-ડે શ્રેણીમાં જીત મેળવી છે. ઝિમ્બાબ્વે અને દક્ષિણ આફ્રિકા સામે પાકિસ્તાને ૨-૧થી શ્રેણી વિજય મેળવ્યો હતો. આ ઉપરાંત ઓસ્ટ્રેલિયાની ટીમ ૧૯૯૮ બાદ પાકિસ્તાનના પ્રવાસે આવી ત્યારે તેનો તેટલાજ અંતરથી વન-ડે શ્રેણીમાં પરાજય થયો હતો. પાકિસ્તાનના કેપ્ટન બાબર આઝના નેતૃત્વમાં પાકિસ્તાન ક્રિકેટ ટીમે તમામ ફોરમેટમાં નોંધપાત્ર પ્રદર્શન કર્યું છે. વેસ્ટ ઈન્ડિઝ સામે બાબરે ફટકારેલી સદીને પગલે તે બીજી વખત સળંગ ત્રણ મેચમાં સદી ફટકારનાર બેટ્સમેન બન્યો હતો. અગાઉ તેણે ૨૦૧૬માં આ સિદ્ધિ હાંસલ કરી હતી.આઈસીસી દ્વારા તાજેતરમાં જાહેર કરાયેલા મેન્સ વન-ડે રેન્કિંગમાં પાકિસ્તાન ચોથા સ્થાને રહ્યું છે. વેસ્ટ ઈન્ડિઝ સામેની વન-ડે શ્રેણીમાં ક્લીન સ્વીપ કરનાર પાકિસ્તાનની વન-ડે ટીમ ભારતથી આગળના ક્રમે રહી છે. ન્યૂઝીલેન્ડની ટીમે ૧૨૫ પોઈન્ટ સાથે ટોચના સ્થાને છે. બીજા સ્થાને એક પોઈન્ટની તફાવત સાથે ઈંગ્લેન્ડની ટીમ છે. આ યાદીમાં ઓસ્ટ્રેલિયાની ટીમ ૧૦૭ પોઈન્ટ સાથે ત્રીજા ક્રમે રહી છે. પાકિસ્તાન અને વેસ્ટ ઈન્ડિઝ વચ્ચે વન-ડે સિરીઝ અગાઉ તે આઈસીસી મેન્સ વન-ડે રેન્કિંગમાં તે ૧૦૨ પોઈન્ટ સાથે પાંચમા ક્રમે હતું. ઉલ્લેખનીય છે કે ભારત ઘરઆંગણે વેસ્ટ ઈન્ડિઝ સામે રમેલી વન-ડે શ્રેણીના બાદ કરતા અન્ય કોઈ વન-ડે નથી રમ્યું. પાકિસ્તાને વેસ્ટ ઈન્ડિઝનો વન-ડેમાં ૩-૦થી વ્હાઈટ વોશ કરતા તે વન-ડે રેન્કિંગમાં ભારતથી આગળ આવી ગયું છે. પાકિસ્તાનની ટીમના ૧૦૬ પોઈન્ટ થયા છે જ્યારે ભારતીય ટીમ ૧૦૫ પોઈન્ટ સાથે પાંચમાં સ્થાને રહી છે. ભારતીય ટીમ આગામી મહિને ઈંગ્લેન્ડ સામે અને ત્યારબાદ વેસ્ટ ઈન્ડિઝ સામે વન-ડે સિરીઝ રમશે અને તેને પોતાના રેન્કિંગમાં સુધારો કરવાની તક રહેશે. પાકિસ્તાન આગામી ઓગસ્ટમાં વન-ડે શ્રેણી રમશે.
