યુક્રેનમાંથી પીછેહઠ નહીં કરે તો તેના ગંભીર પરિણામો ભોગવવા પડશે ઃ બ્રિટન

અમેરિકા
બ્રિટનના વિદેશ સચિવ લિઝ ટ્રૂસે અહીં લોરી ઇન્સ્ટિટ્યૂટ થિંક-ટેંકમાં પોતાના સંબોધનમાં રશિયાના રાષ્ટ્રપતિ વ્લાદિમીર પુતિનને અપીલ કરી હતી કે રશિયાએ યુક્રેન સાથેની સરહદે કોઈપણ સૈન્ય કાર્યવાહી કરવી જાેઈએ નહીં. સરહદ નજીક રશિયન સૈનિકોના એકઠા થવાને કારણે છેલ્લા કેટલાક સપ્તાહમાં તણાવ વધી ગયો છે. તેમણે એમ પણ કહ્યું કે રશિયા અને ચીન લોકતાંત્રિક શક્તિઓ વિરુદ્ધ કામ કરી રહ્યા છે. શીત યુદ્ધના સમયથી આવું ક્યારેય જાેવા મળ્યું નથી. ટ્રૂસે કહ્યું, ‘રશિયા અને ચીન વધુને વધુ સાથે મળીને કામ કરી રહ્યા છે કારણ કે તેઓ આર્ટિફિશિયલ ઇન્ટેલિજન્સ જેવી ટેક્નોલોજીમાં માપદંડો સ્થાપિત કરવાનો પ્રયાસ કરી રહ્યા છે અને સંયુક્ત સૈન્ય કવાયતો અને ગાઢ સંબંધો દ્વારા પશ્ચિમ પેસિફિક પર અવકાશમાં તેમનું વર્ચસ્વ સ્થાપિત કરે છે.’ પુતિનને પોતાની સીધી અપીલમાં, તેમણે કહ્યું કે, ક્રેમલિન ઇતિહાસના પાઠ શીખ્યા નથી. તેઓ સોવિયેત યુનિયનનું પુનઃનિર્માણ અથવા જાતિ અને ભાષાના આધારે એક પ્રકારનું ‘ગ્રેટર રશિયા’ બનાવવાનું સપનું જુએ છે. રશિયાએ યુક્રેન પર કોઈ પણ પ્રકારનો હુમલો કરવાની યોજનાથી ઇનકાર કર્યો છે, પરંતુ પાડોશી દેશની સરહદ નજીક એક લાખથી વધુ સૈનિકો તૈનાત કર્યા છે.અમેરિકાના વિદેશ મંત્રી બ્લીંકને રશિયાને સખત ચેતવણી આપ્યા બાદ હવે બ્રિટને પણ શુક્રવારે રશિયાને ચેતવણી આપી હતી કે જાે તે યુક્રેનમાંથી પીછેહઠ નહીં કરે તો તેના ગંભીર પરિણામો ભોગવવા પડશે. બ્રિટને એમ પણ કહ્યું હતું કે તે લોકશાહી માટે વધી રહેલા ખતરાનો સામનો કરવા માટે ભારત જેવા સહયોગી દેશ સાથે મળીને કામ કરી રહ્યું છે.