લાલપુરમાં રૂપાવટી સહભાગી સિંચાઈ પિયત મંડળી દ્વારા પ્રાંત અધિકારીને આવેદનપત્ર સુપરત કરવામાં આવ્યું છે. આ આવેદનપત્રમાં રૂપાવટી ડેમને સૌની યોજનાના પાણીથી ભરવાની તાત્કાલિક માંગ કરવામાં આવી છે, જેથી ખેડૂતોને સિંચાઈનો લાભ મળી શકે.
મંડળીએ જણાવ્યું કે, લાલપુર પંથકમાં અત્યાર સુધી વાવણી લાયક વરસાદ થયો નથી. જોકે, કેટલાક વિસ્તારોમાં સામાન્ય વરસાદ થયો છે, પરંતુ મોટાભાગના ખેડૂતોએ હજુ વાવણી કરી નથી અથવા પાણીના અભાવે વાવણી કરેલી જમીનને નુકસાન થઈ રહ્યું છે.
ખેડૂતોને હાલમાં ખેતી માટે પાણીની સખત જરૂરિયાત છે, પરંતુ કુવા અને બોર સાવ ખાલી છે. ખેતી એ ખેડૂતોની આજીવિકાનું એકમાત્ર સાધન હોવાથી, અને જમીન કમાન્ડ એરિયામાં આવતી હોવાથી, સૌની યોજના દ્વારા રૂપાવટી ડેમમાં પાણી છોડવામાં આવે તે અત્યંત જરૂરી છે.