જામનગર જિલ્લાના સીંગચ ગામે યોજાયેલી જિલ્લા અને તાલુકા પંચાયતની ચૂંટણીમાં EVM મશીનોના જોડાણમાં ગંભીર ભૂલ થઈ હોવાના આક્ષેપો સાથે ગ્રામજનોમાં ભારે રોષ જોવા મળી રહ્યો છે. બૂથ નંબર 3 અને 4 પર થયેલી આ કથિત ગેરરીતિને સુધારવા અને તે સ્થળે ફરીથી મતદાન કરાવવા માટે ધારાસભ્ય હેમંત ખવા અને ગ્રામજનોએ કલેક્ટરને રૂબરૂ મળી ઉગ્ર રજૂઆત કરી છે.
BU-CU કનેક્શનમાં ક્ષતિ: મતોમાં ગરબડનો દાવો ગ્રામજનોના જણાવ્યા અનુસાર, બૂથ નંબર 3 અને 4 પર ફરજ પરના અધિકારીઓએ ઇલેક્ટ્રોનિક વોટિંગ મશીન (EVM) ના બેલેટ યુનિટ (BU) અને કંટ્રોલ યુનિટ (CU) નું જોડાણ ખોટી રીતે કર્યું હતું. આ ટેકનિકલ ખામીને કારણે મતદારોએ જે ઉમેદવારને મતાધિકાર આપ્યો, તે અન્ય ઉમેદવારના ખાતામાં ટ્રાન્સફર થઈ ગયો હોવાનો ચોંકાવનારો દાવો કરવામાં આવ્યો છે.
વિવાદમાં વધુમાં એવા પણ આક્ષેપો છે કે, તાલુકા પંચાયતના ઉમેદવારને મળેલા મતો જિલ્લા પંચાયતના ઉમેદવારના ખાતામાં ગણાઈ ગયા છે. આ બાબત એટલી ગંભીર છે કે અસંખ્ય મતદારો સોગંદનામા પર જુબાની આપી આ ટેકનિકલ ભૂલને પૂરવાર કરવા તૈયાર હોવાનું આવેદનપત્રમાં સ્પષ્ટપણે જણાવાયું છે.
તંત્ર સામે તાનાશાહીનો આરોપ: ધારાસભ્યનું નિવેદન ધારાસભ્ય હેમંત ખવાએ આકરા પ્રહાર કરતા જણાવ્યું હતું કે, “ગત 28 તારીખે મતગણતરી દરમિયાન આ ગંભીર ભૂલ અમારા ધ્યાને આવી હતી. જે મત આમ આદમી પાર્ટીના ઉમેદવારને મળવા જોઈએ, તે ટેકનિકલ ખામીને લીધે અન્ય પક્ષના ફાળે ગયા છે. અગાઉ રજૂઆત કરવા છતાં તંત્રએ તાનાશાહી દાખવી ભાજપના ઉમેદવારને વિજેતા જાહેર કરી દીધા છે.” તેમણે આ બૂથ પર તાત્કાલિક રી-પોલિંગ યોજવાની પૂરજોર માંગ કરી છે.
ગ્રામજનોની પાયાની માંગણીઓ: વહેલી તકે ચૂંટણીની માંગ ગ્રામજનોની મુખ્ય માંગણીઓમાં બૂથ નંબર 3 અને 4 નું પરિણામ તાત્કાલિક અસરથી રદ કરવું, ચૂંટણી નિયમો મુજબ વહેલી તકે ફરીથી મતદાન (Re-polling) જાહેર કરવું અને આ પ્રકારની બેદરકારી દાખવનાર અધિકારીઓ સામે કડક ખાતાકીય પગલાં લેવાનો સમાવેશ થાય છે.