અમદાવાદના સરદાર વલ્લભભાઈ પટેલ ઇન્ટરનેશનલ એરપોર્ટમાં નવાં કલાત્મક સ્થાપત્યોનું ઉદ્ઘાટન થયું છે, જે ગુજરાતની સંસ્કૃતિ, સ્વતંત્રતાની લડત, અને ભવ્ય વારસાને ઉજાગર કરે છે. આ સ્થાપત્યો ટર્મિનલ 2 પર મુસાફરોને પોતાની સંસ્કૃતિ યાદ કરાવશે. મુખ્ય 3 થીમ પર આધારિત સ્થાપત્યો તૈયાર કરવામાં આવ્યા છે.
જેમાં મહાત્મા ગાંધી, સરદાર વલ્લભભાઈ પટેલ જેવી કલાકૃતિઓ, પિત્તળની પટ્ટીથી નવરાત્રિ અને ઉત્તરાયણ જેવી 3D સ્થાપના અને પતંગો જે સ્ટીલ, પિત્તળ દ્વારા બનાવવામાં આવી છે.
ત્રણ મુખ્ય થીમ પર આધારિત સ્થાપત્યો
- સ્વતંત્રતાની ચળવળ: ડિપાર્ચર્સ ચેક-ઇન હોલમાં મહાત્મા ગાંધી અને સરદાર વલ્લભભાઈ પટેલની કલાકૃતિઓ ભારતની સ્વતંત્રતાની ચળવળમાં ગુજરાતની ભૂમિકાને દર્શાવે છે. આ ભીંતચિત્રો 350 મીટર ધાતુના પટમાં પિત્તળ અને તાંબાના ત્રિ-પરિમાણીય શિલ્પોથી બનેલા છે.
- ઉત્સવ વોલ- નવરાત્રિ અને ઉત્તરાયણ: આગમનના બેગેજ ક્લેમ હોલમાં આવેલી આ જીવંત કલાકૃતિ નવરાત્રિ અને ઉત્તરાયણ જેવા ગુજરાતના પ્રખ્યાત તહેવારોની ઉજવણી કરે છે. તે મોડ્યુલર શીટ બ્લોક્સ અને પિત્તળની પટ્ટીઓથી બનેલું એક ત્રિ-પરિમાણીય સ્થાપન છે.
- પ્રગતિની પતંગ: આ શિલ્પ ગુજરાતની પતંગ ઉડાડવાની પરંપરાથી પ્રેરિત છે અને તેમાં કાંસ્યથી બનેલા બાળકોનાં જીવન-કદના શિલ્પો છે. તે ડોમેસ્ટિક અરાઈવલ વિસ્તારમાં સ્થિત છે અને આશા, પ્રગતિ અને ભાવિ પેઢીઓની આકાંક્ષાઓનું પ્રતીક છે. પતંગો ધાતુ, સ્ટેનલેસ સ્ટીલ, અને એક્રેલિક શીટ્સથી બનેલા છે અને લાઇટ્સથી પ્રકાશિત છે.