જામનગર મહાનગરના વિકાસ કાર્યો માટે મહાનગરપાલિકાના પદાધિકારીઓએ મુખ્યમંત્રી ભૂપેન્દ્ર પટેલની મુલાકાત લીધી હતી. આ મુલાકાતમાં મેયર વિનોદભાઈ ખીમસૂર્યા, ડેપ્યુટી મેયર કૃષ્ણાબેન સોઢા, સ્ટેન્ડિંગ કમિટી ચેરમેન નિલેશભાઈ કગથરા, શાસક પક્ષ નેતા આશિષભાઈ જોષી અને દંડક કેતનભાઈ નાખવા હાજર રહ્યા હતા. શહેરના મુખ્ય વિકાસ પ્રોજેક્ટ્સમાં રિંગ રોડનું નિર્માણ મહત્વપૂર્ણ છે.
રાવલસરથી દરેડ સુધીના 14 કિલોમીટર લાંબા અને 60 મીટર પહોળા રોડનું નિર્માણ થશે. આ રોડ રિલાયન્સ, જીએસએફસી અને નાયરા જેવા ઔદ્યોગિક એકમોને જોડશે. હાલમાં આ પ્રોજેક્ટ પર ત્રણ સરકારી વિભાગો કામ કરી રહ્યા છે.
રિવરફ્રન્ટ પ્રોજેક્ટને તાત્કાલિક મંજૂરી અને ચોમાસા પહેલાં નદીના ખોદાણ માટે ગ્રાન્ટની માગણી કરવામાં આવી. જીઆઈડીસી ફેઝ-2 અને 3માં બિલ્ડિંગ યુઝ પરમિશન મહાનગરપાલિકાને આપવાની માગણી કરાઈ. જૂના જામનગરમાં પુરાતત્વ વિભાગની મંજૂરીઓમાં થતા વિલંબ અંગે પણ રજૂઆત કરવામાં આવી.
150 મીટરથી નાના મકાનો માટે જીડીસીઆરના નિયમોમાં ફેરફારની માગણી કરવામાં આવી. મુખ્યમંત્રીએ જામનગરના વિકાસ પ્રોજેક્ટ્સને ઝડપથી મંજૂરી આપવાની ખાતરી આપી છે. તેમણે જણાવ્યું કે જામનગરની વિકાસ ગાથા અવિરત ચાલુ રહેશે અને મહાનગરપાલિકા દ્વારા રજૂ થનારા પ્રોજેક્ટ્સને તાત્કાલિક મંજૂરી આપવામાં આવશે.