સ્લોવાકિયાના વડાપ્રધાન રોબર્ટ ફિકો પર ગોળી મારીને હુમલો કરવામાં આવ્યો છે, તેઓ ગંભીર રીતે ઘાયલ થયા છે અને તેમને હોસ્પિટલમાં દાખલ કરવામાં આવ્યા છે. આ ઘટના રાજધાની બ્રાતિસ્લાવાના ઉત્તર-પૂર્વમાં લગભગ ૧૫૦ કિલોમીટર દૂર હેન્ડલોવા શહેરમાં બની હતી. અકસ્માત બાદ પીએમને સ્થાનિક હોસ્પિટલમાં લઈ જવામાં આવ્યા હતા, જ્યાંથી હવે તેમને રાજધાની બ્રાતિસ્લાવાની હોસ્પિટલમાં લઈ જવામાં આવ્યા છે. તેમની હાલત ગંભીર હોવાનું કહેવાય છે.
સૂત્રો દ્વારા મળતા રિપોર્ટમાં કહેવામાં આવ્યું છે કે એક શંકાસ્પદની અટકાયત પણ કરી લેવામાં આવી છે. ગોળીબાર બાદ સ્થળ પર હોબાળો મચી ગયો હતો, સામે આવેલા વીડિયોમાં સુરક્ષા દળો આરોપીને કસ્ટડીમાં લેતા અને વડાપ્રધાન ફિકોને કારમાં લઈ જતા જોઈ શકાય છે.
સ્લોવાકિયાના મીડિયા અનુસાર, વડા પ્રધાનની બેઠક પર ચાર ગોળી ચલાવવામાં આવી હતી, જેમાંથી એક વડા પ્રધાનને વાગી હતી. ગોળીબાર કરનાર શંકાસ્પદને ત્યાં હાજર સુરક્ષા દળોએ પકડી લીધો હતો. એવું કહેવામાં આવી રહ્યું છે કે ગોળીઓ ચલાવવાની સાથે જ સુરક્ષા દળોએ વિસ્તારને કોર્ડન કરી લીધો અને હુમલાખોરને કસ્ટડીમાં લઈ લીધો.
સ્લોવેકિયાના રાષ્ટ્રપતિ ઝુઝાના કેપુટોવાએ એક નિવેદન જારી કરીને હુમલાની નિંદા કરી છે. તેમણે હુમલાને “ક્રૂર” ગણાવ્યો અને વડા પ્રધાન ફિકોને ઝડપથી સ્વસ્થ થવાની કામના કરી. મીડિયા રિપોટ્ર્સ અનુસાર, એક પછી એક ગોળીબારનો જોરદાર અવાજ આવ્યો, ત્યારબાદ પોલીસે ગોળીબાર કરનાર વ્યક્તિને તરત જ કસ્ટડીમાં લઈ લીધો.