કચ્છમાં ડંખિલા ઠારથી સતત એક માસથી ધ્રુજી રહેલા કચ્છ જિલ્લાનું વાતાવરણ લઘુતમ તાપમાનમાં સામાન્ય વધારો થતાં ઠંડી માં આંશિક રાહત ફેલાઈ છે. આજે જિલ્લા મથક ભુજનું લઘુતમ તાપમાન 12.6 ડીગ્રીએ રહેતા રાત્રિથી સવાર સુધી શહેરીજનોને ઠંડીનો અનુભવ થયો હતો.
કામકાજથી ઘર બહાર નીકળતા લોકો ગરમ વસ્ત્રોમાં સજ્જ થયેલા જોવા મળ્યા હતા. ઠંડી વચ્ચે પણ ભુજ શહેરના જ્યુબિલિ સર્કલ પર ટ્રાફિક પોલીસ વાહન ચેકીંગ કરતી જોવા મળી હતી. બીજી તરફ સરહદે આવેલા નલિયામાં આજે ન્યૂનતમ પારો 9 ડીગ્રીએ નોંધાયો હતો જોકે તેમ છતાં નલિયા રાજ્યમાં સૌથી નીચું તાપમાન ધરાવતું મથક બન્યું હતું.
ઠંડીની માર યથાવત રહેતા નલિયા અને આસપાસના સરહદી ગામોમાં સંધ્યાકાળથી સન્નાટાનો માહોલ છવાઈ જતો હોવાનું જાણવા મળ્યું હતું.
કચ્છમાં આ વર્ષે ઠંડીએ જાણે અડગપણે રહેવાનું નક્કી કર્યું હોય તેમ ડિસેમ્બર માસના પ્રારંભ સાથેજ એકધારી શીતળતા વાતવરણ માં વર્તાઈ રહી છે અને શિયાળાનો મિજાજ યથાવત રહેવા પામ્યો છે. ભૌગોલિક પરિસ્થિતિ અને વિવિધ પ્રાકૃતિક અસર હેઠળ દિવસે પણ ઠંડક વર્તાઈ રહી છે. ભુજ શહેરના તાપમાનનો ન્યૂનતમ પારો પણ વધીને 12.6 ડિગ્રીએ પહોંયો હતો. સવારના સમયે લોકોને શિત લહેરની અસર વર્તાઈ હતી.